Вірусы гепатыту C (HCV), вірус у культуры не выдзелены. У пашкоджаных клетках печані выяўляюцца вірусападобныя часцінкі дыяметрам 30-60 нм, якія, мабыць, з'яўляюцца вірыёнам віруса. Геном прадстаўлены аднанітачнай пазітыўнай РНК. Устаноўлены структурныя (C і E) і функцыянальныя бялкі. Папярэдне аднесены да флавівірусаў. Для лабараторных жывёл не патагенны. Выклікае гепатыт С, адну з формаў парэнтэральнага (трансфузійнага) гепатыту (ранейшая назва гепатыт ні A ні B). Заражэнне адбываецца пры пераліванні крыві і іншых медыцынскіх умяшаннях. Працякае ў лёгкай, вострай і цяжкай хранічнай формах. У тых, хто перанёс хранічную форму, магчыма развіццё цырозу і першаснага раку печані. Для дыягностыкі ёсць імунаферментная сістэма (анты-НСV).