Полімеразы вірусныя, ферменты, якія каталізуюць працэс сінтэзу НК з рыбануклеязідтрыфасфатаў або дэзоксінуклеязідтрыфасфатаў на матрычнай НК. Адрозніваюць ДНК-залежную ДНК-полімеразу, РНК-залежную РНК-полімеразу, ДНК-залежную РНК-полімеразу і РНК-залежную ДНК-полімеразу, якія адпаведна сінтэзуюць малекулы ДНК, РНК, іРНК, ДНК-копію РНК-геномных вірусаў. Апошні тып полімеразы носіць назву адваротнай транскрыптазы. Полімеразы адных вірусаў уваходзяць у склад вірыёна, другіх - утвараюцца пасля пранікнення віруса ў клетку пад кантролем віруснага генома. Вірусы з фрагментарным і поліплоідным геномамі маюць некалькі полімераз.