Рэспіраторныя вірусы, шматлікая разнародная група вірусаў, месцам размнажэння якіх з'яўляюцца дыхальныя шляхі. Да рэспіраторных вірусаў адносяць ортаміксавірусы, параміксавірусы, рынавірусы. Рэспіраторныя шляхі чалавека таксама паражаюць рэа-, адэна-, герпес-, энтэра-, каронавірусы і вірус натуральнай воспы. Інфекцыі, якія выклікаюцца рэспіраторнымі вірусамі, маюць тэндэнцыю да эпідэмічнага распаўсюджвання, працякаюць бессімптомна або з клінікай, востра або хранічна, па ачаговым або генералізаваным тыпе. Да іх нярэдка далучаецца другасная бактэрыяльная або грыбковая інфекцыя (гл. ВРВІ).
