ступа // ступень // ступня

Ступа. Тэмп руху пры хадзьбе, яздзе на кані.
Сінонімы: поступ, паходка.
Раман запрог каня, палажыў на драбінкі плуг і мернаю ступою паехаў паўскрай яру. Я.Колас.

Ступень.
1. Гарызантальны выступ лесвіцы, на які ступаюць пры пад'ёме ці спуску.
Сінонімы: ступенька, прыступка.
Сесія ў самым разгары. Студэнты чытаюць як ніколі раней. Чытаюць усюды: дома, у бібліятэках, у аўдыторыях, на калідорах каля акон, нават на ступенях лесвіцы - перад заходам на экзамен. ЛіМ.
2. перан. Этап у развіцці, здзяйсненні чаго-н.
Ступень развіцця грамадства не бывае аднолькавай для розных краін.

Ступня. Ніжняя частка нагі ад шчыкалаткі ўніз.
Ён пераступіў з нагі на нагу: ступні балелі, саднелі, заходзіліся ад сцюжы, але цяпер ён не зважаў на іх. В.Быкаў.