тынк // тынкаванне // тынкоўка

Тынк. Маса густога вапнавага раствору з пяском, глінай і інш., які наносяць на паверхню будынкаў, унутраных сцен і г.д.
Пытаюся ў будаўнікоў: - Мо прымеце ўжо навасёлаў? - Рыхтуем пірагі для вас, а вы не падаяце вестак, - дзяўчына кажа мне ў адказ і тынк замешвае, як цеста. М.Аўрамчык.
|| Цвёрды слой такога раствору на паверхні будынкаў, на ўнутраных сценах. Недалёкі выбух. Падлога страсянулася, са столі і сцен пасыпаўся тынк. Дзынкнула разбітая шыба. І.Мележ.

Тынкаванне. Пакрыццё сцен ці столі тынкам, каб зрабіць паверхню гладкай.
Тынкаванне сцен закончана ў тэрмін.

Тынкоўка.
1. Пакрыццё сцен ці столі тынкам; тынкаванне.
У пачатку гэтага рова было глінішча, там брала гліну для тынкоўкі і на печы ўся вёска, таму амаль заўсёды ўлетку дарога пад вокнамі ў завулку была як пафарбаваная. І.Чыгрынаў.
2. Слой тынку на паверхні будынкаў, на столі і сценах унутраных памяшканняў.
Каля балконных дзвярэй на сцяне жаўцела адбітая тынкоўка. М.Даніленка.