По Эдгар Алан (Рое Edgar Allan; 1809-1849), нарадзіўся 19.01.1809 года ў сям'і актораў. Двухгадовым дзіцём страціў бацькоў і выхоўваўся ў сям'і багатага гандляра Джона Элана. Школьную адукацыю атрымаў у Лондане і Рычмандзе (1815-1825). Нядоўгі час вучыўся ў Вірджынскім універсітэце (1826) і ваеннай акадэміі ў Уэст-Пойнце (1831). У 1827 годзе ў Бостане сваім коштам выдаў ананімны зборнік вершаў «Тамерлан і іншыя вершы бостанца», а ў 1829 годзе ў Балтымары - яшчэ адзін зборнік, «Аль-Аараф. Тамерлан і малыя вершы». У гэты час ён служыў у артылерыі. У 30-я і 40-я гады Э.По працуе рэдактарам у пяці літаратурных часопісах. Выходзяць яго новыя кнігі - зборнік «Вершы» (1831), два тамы прозы «Гратэскі і арабескі» (1840), зборнік дэтэктыўных і фантастычных навел (1845), кніга паэзіі «Крумкач і іншыя вершы» (1845). Эдгар По таксама аўтар шэрагу тэарэтычных прац: «Філасофія творчасці» (1846), «Навелістыка Натаніэла Готарна» (1846), «Паэтычны прынцып» (1848-1849).
Апошнія гады жыцця Э.А.По былі гадамі пастаянных пераездаў, хваробы, дэпрэсіі. Ён памёр 07.10.1849 года ў Балтыморы.
Вершы Э.А.По вядомыя беларускаму чытачу па перакладах Алега Мінкіна, прозу перакладаў Уладзімір Шчасны.
Крыніца: Хрэстаматыя па літаратуры народаў свету. Менск, 1995.
Выбраныя творы Эдгара Алана По на Беларускай Палічцы
