Яфімаў Фёдар (псэўданімы: Ф.Архіпаў, Ф.Архипов, Фёдор Архипов; 05.05.1933, в. Новатраецкае Цярноўскага р-ну Варонескай вобл., Расея), паэт, літаратурны крытык, перакладчык; у 1960-1970 публічна выступаў супраць цэнзуры, за што перасьледаваўся. Жыве ў Менску, піша на расейскай і беларускай мовах.

Прафэсійны вайсковец. У 1951 скончыў Чарапавецкую пяхотную вучэльню, у 1957 - Цэнтральныя курсы палітычных работнікаў у Смаленску; служыў прапагандыстам у вайсковых частках Беларускай вайсковай акругі (1958-1962). У 1963 дэмабілізаваўся ў званьні капітана Савецкай арміі.

У 1967 завочна скончыў Літаратурны інстытут у Маскве. У 1966-1967 - загадчык аддзелу нарысаў і публіцыстыкі часопісу «Нёман».

У красавіку 1968 на аб'яднаным партсходзе творчых саюзаў БССР Я. публічна выступіў супраць умяшальніцтва СССР ва ўнутраныя справы Чэхаславаччыны, супраць цэнзуры. За гэта быў выключаны з КПСС, перасьледаваўся - ня мог уладкавацца на працу і жыў у безграшоўі [2:98-99].

У часы цкаваньня А.Салжаніцына выступаў у падтрымку расейскага пісьменьніка - зьвярнуўся ў сакратарыят Саюзу пісьменьнікаў СССР зь пісьмовым пратэстам супраць гэтых перасьледаў. Я. падтрымаў пісьменьніцу Л.Вакулоўскую, якую абвінавачвалі ў антысаветызме.

Літ.: 1. Беларускія пісьменнікі. Біябібліяграфічны слоўнік. У 6 т. Т. 6. - Менск, 1995. С. 531-535; 2. Валентин Тарас. На острове воспоминаний // Нёман. 1998, № 5.

Сяргей Сахараў

Паведаміць пра недакладнасьць