Матэматычная энцыклапедыя

Дырыхле Пэтэр Ґустаў Лежон (Dirichlet Peter Gustav Lejeune; 13.02.1805-05.05.1859), нямецкі матэматык. У 1831-1855 гг. праф. Берлінскага, з 1855 г. Гётынгенскага ўніверсітэтаў, акад. Лонданскага каралеўскага таварыства (1855), Парыжскай АН (1854), Берлінскай АН, замежны чл.-кар. Пецярбургскай АН (1837). Асноўныя працы па тэорыі лікаў і матэматычным аналізе. Д. належыць доказ тэарэмы пра існаванне бясконцай колькасці простых лікаў у кожнай арыфметычнай прагрэсіі з цэлых лікаў, першы элемент і рознасць якой - лікі ўзаемна простыя. Д. увёў функцыйныя шэрагі асаблівага выгляду (гэтак званыя Дырыхле шэрагі). У матэматычным аналізе Д. упершыню сфармуляваў і даследаваў паняцце ўмоўнай збежнасці шэрагу, устанавіў прыкмету збежнасці шэрагу (гэтак званая Дырыхле прыкмета, 1862), даў (1829) строгі доказ магчымасці раскладання ў шэраг Фур'е функцыі, якое мае концую колькасць максімумаў і мінімумаў. Д. належаць працы па механіцы і матэматычнай фізіцы (Дырыхле прынцып у тэорыі гарманічных функцый).

Тв.: Лекции по теории чисел. М.; Л., 1936.

Паведаміць пра недакладнасьць