-
221
Ня сучка брэша, а карытца. — Просты сэнс: Калі сучку будзеш добра карміць, дык яна будзе добра брахаць. Сучкай завуць і чалавека, які за магарыч гатоў ачарніць, збэсьціць, зьняважыць нявіннага чалавека. Прыказваюць, калі гэткі падкуплены чалавек за добрае «карытца» добра брэша за свайго гаспадара.
-
222
Ня сьлепа бяло, што ў вадзе было. — Жартаўлівы адказ прачкі, калі ёй заўважаюць, што бялізна ня бела памыта.
-
223
Ня сьмейся брудзя, бо й табе будзя. — Ня можна сьмяяцца над няшчасьцем чалавека, бо й самому можа тое самае стацца.
-
224
Ня сьпіцца ваўку пад сялом. — Аб тым, каму ў нейкім месцы трывожна.
-
225
Ня той чарвяк, што мы зьядзім, а той чарвяк, што нас зьесьць. — Жартуюць старыя, калі ім дзеці напамінаюць, каб хаця чарвівых грыбоў у ежу не наклалі.
-
226
Ня толькі дурань вала губляя. — Калі й у разумнага здарыцца няшчасная прыгода ці памылка.
-
227
Ня тут казана. — Прыказваюць перад апавяданьнем жахлівага выпадку: «Ня тут казана, там у лесе на дарозе разбойнікі чалавека забілі».
-
228
Ня ўвесь той сьвет, што ў вакне. — Ня толькі тое ёсьць на сьвеце, што перад намі. Далей, магчыма, ёсьць цікавейшыя й прыгажэйшыя рэчы. Прыказваюць, калі некаму пры сватаньні адмовіць дзеўка ці калі ня купіцца тую рэч ці жывёліну, якую таргуецца.
-
229
Няўмеку рукі ні баляць. — Гэтак дакараюць таму, які недаўмее рабіць нейкае работы й яму даводзіцца перарабляць яе колькі разоў.
-
230
Няўрокам кажучы. — Папярэджаньне, каб не ўрачы тэй жывёліны ці чалавека, што хваляць. (Няўрокам кажучы, наша цялушка відучы расьце).
-
231
Няўрымшчу, стаю як на жары. — Прыказвае тай, хто хоча хутчэй скуль-небудзь пайсьці, бо моцна турбуецца аб лёсе блізкіх людзей ці за бясьпеку свае маемасьці.
-
232
Ня ўсе тыя краскі цвытуць, што рана распускаюцца. Ня ўсе дзеўкі замуж ідуць, што змалада кахаюцца. — Аб тэй дзеўцы, якая змоладу была стройная й павабная, але замуж ня вышла.
-
233
Ня ўсё тоя золата, што блішчыць. — Аб штучна аздобленай таннай рэчы. Прыказваюць і аб чалавеку, які хоць і добра выглядае, але благі й бязвартасны.
-
234
Ня ўсё тоя смачна, што соладка. — У простым сэнсе аб страве: страва, якая сама сабой усаладжае, нясмачная й нездаровая. Хлеб недакіслы салодкі й нясмачны. Прыказваюць аб чалавеку, у якога лісьлівыя словы, а падступныя й зрадлівыя чыны.
-
235
Ня ўсё тоя хораша, што чырвана. — Нашыя прашчуры чырвоным колерам прыбіралі свой белы адзетак, жычкай завязвалі белую сарочку, чырвонымі ніткамі адтыкалі вузоры на жаночых сарочках, чырвонай істужкай абкладалі сярмягі. Але суцэльнага чырвонага адзетку ненавідзелі, бо толькі каты ўбіраліся ў чырвоны адзетак.
-
236
Ня ў тым дзіва, што кабыла сіва, а ў тым дзіва, што возу ні вязе. — Калі няма ўдачы ў нейкай справе ці рабоце, дык трэба ня ў вонкавым выглядзе яе шукаць, але ў нутраных якасьцях.
-
237
Ня цешся, калі знашоў, і ні смуціся, калі згубіў. — Цешыцца сваей знахадкай, гэта цешыцца бядой таго чалавека, хто згубіў. Свая-ж згуба вуча быць пільнейшым і асьцеражнейшым.
-
238
Ня цешся чужой бядзе, бо свая ідзе. — Аб тым, хто цешыцца з чужога няшчасьця.
На запыт знайшлося 238 артыкулаў
Паведаміць пра недакладнасьць