бізнесовец -соўца, м. Той, хто займаецца бізнесам; бізнесмен.
Менавіта ён, маскоўскі бізнесовец родам з Гомеля, спрыяў з'яўленню першага прыватнага тэатра ў Беларусі. (ЛіМ. 23.02.1996)

бізнесовы -ая, -ае. Які мае дачыненне да бізнесу.
Апошнім часам нямецкамоўны Цюрых стаў найбуйнейшым фінансавым і бізнесовым цэнтрам краіны. (Навіны. 13.03.1998)

бітлівы -ая, -ае. Які мае схільнасць да боек, любіць біцца.
Марудна цягнуўся вечар, хоць троху і было баўнага занятку ў тым, што супакойвалі крыклівых і бітлівых Казю і Мечыка, рыхтавалі вячэру... (М.Гарэцкі)

бітма прысл. Бітком.
Клумлівая куламеса людзей - там усе нацыі і клясы - бітма набіла перон. (М.Гарэцкі) Мне зразумела, чаму і на Мальера, і на Купалу - бітма набітая зала. Людзям, як і артыстам, хочацца радасці. (ЛіМ. 17.09.1993)