патыліца
убачыць (угледзіць) як сваю патыліцу. Докш., Слон., Івац. Іран. Пра нешта, што нельга ўбачыць, нельга атрымаць, дачакацца абяцанага. Высл., 403; Санько, 191; ЗЗайкі.

патэльня
гладка як на патэльні. Ухв. Пра роўны, гладкі ўчастак зямлі. Янк., Пар., 39.
круціцца (віцца, вярцецца) як уюн на [гарачай] патэльні (скаўрадзе, скаварадзе). Гл. уюн.
лёгкі на ўспамін як з патэльні блін. Сен., Докш. Насмешл. Пра хуткае з'яўленне кагосьці, пра каго гаварылі. Высл., 341.
падскокваць як кот на гарачай патэльні. Гл. кот.
паўзці як мачанка 〈па патэльні〉. Гл. мачанка.
пішчаць як піскун на патэльні. Гл. піскун.
скверціся як сала на патэльні. Гл. сала.
як вуж на патэльні. Гл. вуж.

паўлін
прыбрацца як паўлін. Насмешл. Пра надта страката, залішне модна апранутага чалавека. Янк., Пар., 132.

паўцінне, гл. павуціна

паўшоры
ісці (пасаваць, падыходзіць, прыстаць, прыходзіцца) як карове (свінні) паўшоры. Гл. карова.

пахаванне
ісці як на пахаванне. Мін. Няўхв. Пра ціхую марудную хаду. ЛЦ, 71.

пахаваць
засмучаны баццэ каго пахаваў. Слуцк. Няўхв. Пра чалавека вельмі засмучанага. Сержпутоўскі 1998, 283.
на сэрцу як бы пахаваў каго. Ваўк. п. Пра свой стан журботы, маркоты (чалавек). Federowski, 274.
цяжка на сэрцы, баццэ сам сябе пахаваў. Гл. сам.

пахаць
так хочацца рабіць як сабацы пахаць. Гл. сабака.

пахлапень
як пахлапень. Мсцісл. Зняважл. Пра чалавека дужа простага, недалёкага, неадукаванага, як лапаць з вяровачным падплётам. Юрчанка, 194.

пац
мокры як пац. Гродз., Навагр. Жарт. Пра вельмі спацелага чалавека. Даніловіч, 241. ≺ Пац - пацук.

пацалавацца
як са смерцю пацалаваўся. Гл. смерць.

пацалаваць
як чорт пацалаваў. Гл. чорт.

пацарапаць
на сэрцы як кот пацарапаў. Гл. кот.

пацерачка
вочкі як пацерачкі. Памянш.-ласк. Слон. Ухв. Пра нечыя малыя, круглыя, бліскучыя вочкі. Высл., 294.

пацеркі
бульба як пацеркі. Маладз. Няўхв. Пра малую, дробную бульбу. Гілевіч, 104.
маленькія як пацеркі. Валож. Пра нейкія дробныя прадметы. Высл., 345.
падыходзіць як свінні пацеркі. Гл. свіння.
слёзы як пацеркі. Ваўк. п. Пра буйныя слёзы каго-н. Federowski, 303.

пацеры
разбірацца як свіння ў пацерах. Гл. свіння.
так (пэўна) як аман у пацерах. Гл. аман.
знаць як амынь у пацеровы. Гл. аман.
балбатаць як пацеры гаварыць. Няўхв. Пра надта складную балбатню кагосьці. Янк., Пар., 14.
ведаць як пацеры што. Стаўб. Ухв. Пра добрае, дасканалае веданне, разуменне ў якой-н. справе. МК, 36-37.
патрэбна як чорту пацеры. Гл. чорт.
работа йдзе як у Рамана пацеры. Воран. Ухв. Пра чыюсьці спорную, складную работу. Даніловіч, 260.
умець як пацеры. Ваўк. п. Пра чалавека, які напамяць ведае сваю справу. Federowski, 319.
як з кабылаю пацеры мовіць. Гл. кабыла.

пацерына
свяціць як пацерына. Леп. Ухв. Відаць, пра штосьці бліскучае, дробнае. АВНЛ.

пацеха
здаўся на прыказкі як арэхі дзеля пацехі. Гл. арэх.

пацук
глядзець як пацук з мукі. Няўхв. Жарт. Пра чалавека з нейкім характэрным поглядам. Ляцкий, 7.
мітусіцца як падсмалены пацук. Рэч., Чэрык., Мін. Насмешл. Пра чалавека вельмі мітуслівага, панікуючага, перапалоханага. ЛЦ, 72.
мокры бы пацук. Гродз., Стол., Навагр. Жарт. Пра вельмі спацелага чалавека. Даніловіч, 241; ТС 4, 19.
прытаіцца як пацук у пустым засеку. Мін. Насмешл. Пра кагосьці, што імкнецца схавацца, адседзецца, прычакаць свой час. ЛЦ, 58.
спацець як пацук. Гродз. Жарт. Даніловіч, 241. Тое, што мокры як пацук.
шкодны як пацук. Ваўк. п., Докш. Няўхв. Пра шкадлівага чалавека. Federowski, 299; АВНЛ.

пацучок
жырны як пацучок. Памянш. Мсцісл. Насмешл. Пра некага даволі сыценькага, ускормленага. Юрчанка 1998, 39.