Паратыт эпідэмічны (сін. свінка), востразаразнае віруснае захворванне дзяцей, якое характарызуецца сіметрычным паражэннем калявушных слінных залоз і эпідэмічным распаўсюджваннем. Выклікаецца параміксавірусам. Вірус мае тыповую для гэтага сямейства будову вірыёна. Валодае гемаглютынуючай, нейрамінідазнай, гемалітычнай і сімпластаўтваральнай актыўнасцямі. Патагенны для лабараторных жывёл. Размнажаецца ў курыным эмбрыёне і культурах клетак, утвараючы сімпласты і прыдаючы ім гемадсарбавальныя ўласцівасці. Антыгенная структура аднародная і стабільная. Вірус перадаецца паветрана-кропельным шляхам. Паратыт вірусны працякае ў залозістай, нервовай і змешаных формах. Для дыягностыкі выкарыстоўваюць выдзяленне віруса са сліны на курыных эмбрыёнах і культуры клетак і выяўленне нарастання цітру антыцел у РТГА і РЗК. Для прафілактыкі выкарыстоўваюць жывую вакцыну.
