Персістэнцыя вірусаў, працяглае вегетаванне або суіснаванне віруса ў арганізме прыроднага гаспадара ці ў штучнай сістэме для культывавання вірусаў. Праяўляецца ў латэнтнай, хранічнай або павольнай маніфестнай інфекцыі арганізма. У выпадках маніфестнай інфекцыі вірус выклікае хранічную малапрадуктыўную інфекцыю ўспрымальных клетак без множнай іх гібелі. Пры латэнтнай інфекцыі геном віруса або геном, інтэграваны з геномам клеткі-гаспадара, або некалькі копій генома знаходзяцца ў выглядзе эпісом у цытаплазме клеткі.
