Д'Алямбэр Жан Лерон (D'Alembert Jean Le Rond; 16.11.1717-29.10.1783), французскі матэматык, акад. Парыжскай АН (1741), Французскай акадэміі (1754), замежны ганаровы акад. Пецярбургскай АН (1764) і іншых акадэмій. Асноўныя матэматычныя працы Д. па тэорыі дыферэнцыяльных раўнанняў, дзе ён даў метад развязання дыферэнцыяльнага раўнання 2-га парадку з частковымі вытворнымі (хвалевага раўнання). У тэорыі шэрагаў шырока ўжываецца дастатковая прыкмета збежнасці (Д'Алямбэра прыкмета). Д. належаць важныя вынікі ў тэорыі дыферэнцыяльных раўнанняў са сталымі каэфіцыентамі і сістэм такіх раўнанняў 1-га і 2-га парадку. Д. упершыню выкарыстаў у дыферэнцыяльных раўнаннях функцыі камплекснай зменнай. Д. першы (1743) сфармуляваў правілы складання дыферэнцыяльных раўнанняў для руху адвольных матэрыяльных сістэмаў, пераўтвараючы задачы дынамікі да статыкі - гэтак званы прынцып Д., і выкарыстаў яго (1774) для абгрунтавання гідрадынамікі.

Літ.: Добровольский В.А. Д'Аламбер. М., 1968.