Анкорнавірусы, падсямейства рэтравірусаў. Вірыён мае сферычную форму, памер 80-110 нм. Нуклеоід складаецца з дзвюх копій лінейнага аднанітачнага негатыўнага РНК-генома, кавалентна звязанага з адваротнай транскрыптазай. Капсід двухслойны. Паверх капсіду размяшчаецца ліпапратэінавая абалонка з рэцэпторнымі выступамі. Ва ўспрымальнай клетцы з дапамогай адваротнай транскрыптазы ўтвараюць ДНК-копіі генома, якія пасля пераходу ў колападобную форму інтэгруюць з геномам клеткі-гаспадара, прыўносячы ім і анкаген (гл. анкагены). Вірусны геном або рэпрэсуецца, або, што радзей, трансфармуе з дапамогай анкабялкоў нармальную клетку ў пухлінную з утварэннем ці без утварэння экстрахрамасомнага віруса. Выдзяляюць наступныя роды: анкорнавірусы C - узбуджальнікі лейкозаў і сарком у мышэй, пацукоў, кошак, свіней, птушак, буйной рагатай жывёлы, малпаў, пухлін паўзуноў; анкорнавірусы B - узбуджальнікі раку малочных залоз мышэй і марскіх свінак; анкорнавірусы D выдзелены з культур клетак чалавека, якія былі атрыманы са злаякасных пухлін, некалькі анкорнавірусаў тыпу D выяўлена ў малпаў і мангустаў.
