Матэматычная энцыклапедыя

Фэрма П'ер (Fermat Pierre; 17.08.1601-12.01.1665), французскі матэматык. Адзін з стваральнікаў тэорыі лікаў. З яго імем звязаны дзве славутыя тэарэмы: Фэрма вялікая тэарэма і Фэрма малая тэарэма. У галіне геаметрыі Ф. у больш сістэматычнай форме, чым Р.Дэкарт, развіў метад каардынат, даў раўнанні простай і крывых 2-га парадку і паказаў шлях доказу сцверджання пра тое, што ўсе крывыя 2-га парадку - канічныя сечывы. Ф. даў агульнае правіла дыферэнцавання ступеневай функцыі, якое распаўсюдзіў на адвольныя рацыянальныя паказнікі. Ф. належыць правіла знаходжання экстрэмумаў. Ён даказаў у агульным выглядзе правіла інтэгравання ступеневай функцыі і распаўсюдзіў яго на выпадак дробавых і адмоўных ступеняў. Ф. належаць працы па оптыцы, тэорыі імавернасцяў.

Літ.: История математики. Т. 2. М., 1970.

Паведаміць пра недакладнасьць