Паходзіў з заможнай сялянскай сям'і. Пачатковай адукацыі не атрымаў, але добра валодаў польскай мовай. Як каталік, вылучаўся сваёй набажнасьцю.
У час стварэньня мясцовага калгаса Я. застаўся адзінаўласьнікам і заклікаў іншых ухіляцца ад калектывізацыі. За гэта яго шматразова адміністратыўна каралі мясцовыя ўлады. Дэманстратыўна вывешваў над сваёй хатай польскі сьцяг. У 1960-я Я. быў арыштаваны й тры гады ўтрымліваўся ў Рыскай турме за тое, што бараніў ад разбурэньня будынак касьцёлу.
Па вызваленьні ён неаднаразова ў публічных месцах выступаў супраць савецкага ладу, пакуль ня быў схаваны ў псыхіятрычную лякарню, дзе прабыў восем апошніх гадоў жыцьця. Сканаў у Шчучынскай вар'ятні.
Кр.: Успаміны сваякоў Язэпа Яблонскага (у архіве аўтара).
Юры Грыбоўскі
