Суполка існавала ў 1987-1989; складалася, пераважна, са студэнтаў і выпускнікоў МІКа - у розныя часы ад 6 да 15 чалавек сяброў і прыхільнікаў. Кіраўніцтва: старшыня - Ю.Лаўрык, нам. старшыні - Л.Сьвяньцецкая, рэд. насьценнай газэты - А.Федарэнка, скарбнік - І.Коваль. Сябры суполкі асаблівую ўвагу надавалі культурна-асьветніцкай дзейнасьці, што дэкляравалася ў падназве суполкі. Палітычныя акцыі, аднак, таксама не ігнараваліся.
Асноўная праца вялася ў некалькіх накірунках. З. ажыцьцяўляў прапаганду ведаў па беларускай гісторыі, літаратуры і культуры ў МІКу. Зьяўляючыся ад моманту стварэньня Канфэдэрацыі Беларускіх Суполак яе калектыўным сябрам, З. выконваў функцыі інфармацыйна-бібліяграфічнай службы КБС, рэалізоўваючы апрацаваньне і пашырэньне бібліяграфічнай інфармацыі па розных тэмах на патрэбу руху. Гэтая праца афармлялася ў выглядзе кансультаваньняў, падрыхтоўкі бібліяграфічных сьпісаў і паказальнікаў. Была ажыцьцёўленая спроба выпуску пэрыядычнага выданьня «Весткі Адраджэньня». Сябры З. бралі чынны ўдзел у распаўсюджаньні, а таксама і памнажэньні цяжка даступных друкаваных матэрыялаў па гісторыі і культуры Беларусі (напр., заходнебеларускіх і эмігранцкіх публікацыяў і выданьняў). Супрацоўнічаючы зь іншымі суполкамі, З. браў удзел у падрыхтоўцы і правядзеньні шэрагу палітычных і культурных мерапрыемстваў: Калядаў, Купальляў, Дзядоў, памятных вечарынаў, мітынгаў і г.д. З. займаўся дабрачыннай дзейнасьцю.
Юрась Лаўрык
