Радына Якаў (н. 01.12.1946, в. Брылькі Менскай вобл.), д-р фізіка-матэматычных навук (1987, Экспаненцыйныя вектары і дыферэнцыяльныя раўнанні), праф. (1987). Скончыў БДУ (1969), дзе і працуе. Навуковыя працы па функцыянальным аналізе, дыферэнцыяльна-аператарных раўнаннях, абагульненых функцыях. Пабудаваў функцыянальнае злічэнне і даў яго дастасаванні да даследавання развязальнасці і вывучэння ўласцівасцяў развязкаў дыферэнцыяльных, псеўдадыферэнцыяльных і дыферэнцыяльна-аператарных раўнанняў у банахавых і лакальна-выпуклых прасторах, пабудаваў (разам з А.Антаневічам) тэорыю нелінейных абагульненых функцый. Прэмія ЛКСМБ (1978). Дзяржаўная прэмія Беларусі (1996).Тв.: Линейные уравнения и борнология. Мн., 1982; Функциональный анализ и интегральные уравнения. Мн., 1984 (разам з А.Антаневічам); Векторы экспоненциального типа // ДУ. 1985. Т. 21, № 9.
