Мархель Уладзімір, нарадзіўся 20 красавіка 1940 года ў вёсцы Жыгалкі Стаўбцоўскага раёна Менскай вобласці. Пасля сканчэння філфака БДУ (1964) працаваў настаўнікам, навуковым рэдактарам. З 1978 г. - навуковы супрацоўнік Інстытута літаратуры імя Я.Купалы НАН Беларусі. Кандыдат філалагічных навук. Займаецца літаратуразнаўчай і перакладчыцкай працай. Даследуе беларускую літаратуру ХІХ ст., беларуска-польскія культурныя ўзаемасувязі. Аўтар кніг «Лірнік вясковы: Сыракомля ў беларуска-польскім літаратурным узаемадзеянні» (1983), «Вяшчун славы і волі: Уладзіслаў Сыракомля» (1989), «Крыніцы памяці: Старонкі беларуска-польскага літаратурнага сумежжа» (1990), «Прадвесце: Беларуска-польскае літаратурнае ўзаемадзеянне ў першай палавіне ХІХ стагоддзя» (1991), «Прысутнасць былога» (1997), «"Ты як здароўе...": Адам Міцкевіч і тэндэнцыі адраджэння беларускай літаратуры» (1998). З польскай мовы на беларускую пераклаў асобныя творы А.Міцкевіча, У.Сыракомлі, В.Каратынскага, Я.Лучыны, Л.Стафа, Ю.Тувіма і інш. Падрыхтаваў і выдаў анталогію польскамоўнай літаратуры Беларусі ХІХ ст. «Раса нябёсаў на зямлі тутэйшай» (1998), санеты А.Міцкевіча, творы В.Каратынскага, Я.Лучыны і інш.
Крыніца: Янка Купала. Санеты. Менск, Мастацкая літаратура, 2002.
