Геаграфічныя паняцці і тэрміны

(116 артыкулаў)

Геаграфічныя паняцці і тэрміны
Створана на падставе:
Геаграфічныя паняцці і тэрміны. Менск: Беларуская Энцыклапедыя, 1993. ISBN 5-85700-085-8

Энцыклапедычны даведнік «Геаграфічныя паняцці і тэрміны» змяшчае больш за 2 тысячы значных тэрмінаў па геаграфічных дысцыплінах і сумежных навуках, якія найбольш часта выкарыстоўваюцца ў падручніках, навуковай літаратуры і практыцы. Прызначаны для вучняў сярэдніх школ, настаўнікаў, студэнтаў.

Рэдакцыйная калегія
М.Курловіч, Я.Малашэвіч, С.Самуэль, Б.Сачанка, С.Сідор, І.Хаўратовіч

Над кнігай працавалі
Рэдакцыя геаграфіі і геафізікі: загадчык рэдакцыі М.Курловіч; навуковыя рэдактары І.Афнагель, В.Вераценнікава, С.Крукава, Я.Цупа, Я.Якубоўскі.
Рэдакцыя навуковага і літаратурнага кантролю: загадчык рэдакцыі С.Самуэль; навуковыя рэдактары Т.Бутэвіч, М.Маўзон.
Мапы падрыхтавалі: навуковы рэдактар Г.Шыкунова, рэдактар В.Надзененка.


Ад рэдкалегіі

Энцыклапедычны слоўнік «Геаграфічныя паняцці і тэрміны» - універсальнае даведачнае выданне, прызначанае для вучняў усіх класаў, дзе вывучаюць геаграфію, а таксама шырокага кола чытачоў, студэнтаў, настаўнікаў, прыродазнаўцаў, работнікаў сродкаў масавай інфармацыі і інш. Ён тлумачыць і адлюстроўвае структуру ўсёй сістэмы геаграфічных навук і таму можа мець для зацікаўленага чытача не толькі пазнавальнае, а і пэўнае практычнае значэнне. Выданне гэтага слоўніка будзе спрыяць увядзенню ва ўжытак геаграфічнай тэрміналогіі на беларускай мове.

У слоўніку ў алфавітным парадку змешчана больш за 2 тысячы тэрмінаў комплекснай фізічнай геаграфіі, геамарфалогіі, метэаралогіі і кліматалогіі, гідралогіі, акіяналогіі, гляцыялогіі, геаграфіі глеб, біягеаграфіі, эканамічнай, сацыяльнай, палітычнай геаграфіі, геаграфіі насельніцтва, картаграфіі і інш., якія найбольш часта выкарыстоўваюцца ў школьных і студэнцкіх падручніках, навуковай літаратуры, практыцы. Чытач знойдзе ў слоўніку тлумачэнне і значнай колькасці тэрмінаў з сумежных навук - астраноміі, геадэзіі, экалогіі, сацыялогіі і інш. У кнізе шмат картаграфічнага і ілюстрацыйнага матэрыялу.

Каб пазбегнуць паўтарэння матэрыялу і дапоўніць неабходнай інфармацыяй звязаныя паміж сабой артыкулы, у слоўніку выкарыстана сістэма спасылак. Шэраг артыкулаў па эканоміцы, кліматалогіі, геамарфалогіі, геалогіі і інш. дысцыплінах, акрамя агульных звестак, уключае рэгіянальныя даныя і ілюстрацыйны матэрыял па Беларусі.

Пры рабоце над кнігай улічаны вопыт складання 12-томнай «Беларускай Савецкай Энцыклапедыі» (1969-1975) і 5-томнай «Энцыклапедыі прыроды Беларусі» (1983-1986), былі выкарыстаны «Геаграфічны энцыклапедычны слоўнік» (М., 1988), «Геаграфічны слоўнік школьніка» І.Галая і С.Сідора (Мн., 1986), «Чатырохмоўны энцыклапедычны слоўнік тэрмінаў па фізічнай геаграфіі» (М., 1980), слоўнікі па метэаралогіі, геамарфалогіі, глебазнаўству, гляцыялогіі, геалогіі і інш.

Навукі аб Зямлі і грамадстве няспынна развіваюцца і ўдасканальваюцца, таму ў слоўніку магчымы пэўныя недахопы. Аўтары і складальнікі з удзячнасцю прымуць усе заўвагі і пажаданні чытачоў, што дазволіць палепшыць якасць слоўніка пры яго магчымым перавыданні.



Паведаміць пра недакладнасьць