Атрымаў вышэйшую адукацыю ў Гомельскім унівэрсытэце (1979-1984). З 1981 зьвязаны зь беларускім моладзевым рухам. У 1982 уступіў у «Майстроўню», браў удзел у стварэньні, друку і распаўсюджваньні незалежніцкага самвыдавецкага часопісу «Бурачок». Адзін са стваральнікаў Таварыства Маладых Літаратараў «Тутэйшыя» (1986-1989), старшыня «Тутэйшых»; адзін з стваральнікаў «Мартыралёгу Беларусі», сябра Арганізацыйнага камітэту БНФ «Адраджэньне», адзін з заснавальнікаў Беларускай Каталіцкай Грамады (1990). Быў адным з заяўляльнікаў «Дзядоў-87», заяўляльнік «Дзядоў-88».
Друкаваўся ў самвыдавецкіх часопісах «Бурачок», «Вера», у газэце «Грунвальд». Рэдагаваў з удзелам Сяргея Дубаўца № 1 і № 2 часопіса Таварыства Маладых Літаратараў «Тутэйшыя» «Кантроль» (1988-1989). Рэдагаваў часопіс «Вера» (1988).
За актыўную дзейнасьць у «Тутэйшых» некалькі разоў Б. «разьбіраўся» на агульным сходзе Інстытуту літаратуры АН БССР, дзе ў той час быў асьпірантам. За арганізацыю і ўдзел у акцыі «Дзяды-88» затрыманы і пакараны адміністрацыйным штрафам. З 1987 - пад пільным наглядам КГБ.
У 1992-1996 - дэпутат Менскага гарадзкога савету. Да 1998 - дырэктар музэя Максіма Багдановіча. З 1997 кіруе праваабарончым Цэнтрам «Вясна-96», рэдактар бюлетэню «Права на Волю» (выходзіць са студзеня 1998).
Сяргей Сахараў
