Скончыў у Менску прафэсыйна-тэхнічную вучэльню № 68, пасьля працаваў рабочым на вытворчым аб'яднаньні «Інтэграл». У 1989 скончыў гістарычны факультэт БДУ.
З 1986 - актывіст клюбу «Талака», з 1987 - нязьменны старшыня клюбу «Талака», каардынатар Канфэдэрацыі беларускіх суполак. З 1988 - у БНФ. Стала займаўся каардынацыяй і арганізацыяй моладзевага руху, кіраваў правядзеньнем шматлікіх акцыяў, у прыватнасьці - мітынгам на Верхнім горадзе ў Менску зімою 1987 супраць будаўніцтва мэтрапалітэна пад гістарычным цэнтрам гораду, Вальным Соймам беларускіх суполак зімою 1988, экалягічных маршаў па Прыпяці і Дзьвіне. Як кіраўнік клюбу «Талака», рэгулярна ладзіў масавыя мерапрыемствы, найперш - фальклёрныя моладзевыя сьвяты (Купальле, Каляды, Гуканьне Вясны), талокі наТраецкім прадмесьці, Верхнім горадзе ў Менску. Уваходзіў у ініцыятыўную групу Аргкамітэту БНФ, браў удзел у Першым зьездзе БНФ у Вільні.
Актор самадзейнага тэатру «Золак»; найбольш значная роля - Васіль Вецер («Маці ўрагану» паводле п'есы Ў.Караткевіча). Аўтар шэрагу публікацыяў па праблемах моладзевага руху, аховы помнікаў краязнаўства («Мастацтва Беларусі», «ЛіМ», «Голас Радзімы», «Чырвоная Змена», «Навіны БНФ», «Брук»).
Знаходзіўся пад адміністратыўнымі пакараньнямі, тэндэнцыйна крытыкаваўся ў камуністычным друку («Политический собеседник», «Вечерний Минск», «Советская Белоруссия», «Звязда») за палітычную й культурніцкую дзейнасьць.
З 1991 стала жыве ў Вільні, працуе настаўнікам у беларускай гімназіі (СШ № 64).
Літ.: 1. Ул.Гойтан. Чаго хочуць «талакоўцы»? // Звязда. 17.08.1988; 2. Чаго хочуць «талакоўцы»? Рэха публікацыі // Звязда. 23.08.1988; 3. Т.Бумажкова. Запевалы закулисного хора // Вечерний Минск. 16.03.1990; 4. С.Вітушка, З.Позняк, Ю.Ходыко. Возвращаясь к напечатанному «Запевалы закулисного хора» // Вечерний Минск. 23.08.1990; 5. Б.Залесский, М.Ильюшенко. Позиция или поза? // Вечерний Минск. 05.04.1988; 6. Эволюция политического невежества (Н.Дорожкин, А.Барданов, А.Филимонов, Д.Жмуровский, К.Доморад) // Вечерний Минск. 21.10.1988.
Сяргей Харэўскі
