Арганізатарамі клюбу былі супрацоўнікі Інстытуту біяхіміі АН БССР і выкладчыкі беларускай літаратуры Гарадзенскага ўнівэрсытэту. Кіраўнікі «Паходні»: гісторык Міхась Ткачоў - старшыня, і біяхімік Мікола Таранда - адказны сакратар. Сябрамі суполкі былі многія вядомыя навукоўцы, літаратары, мастакі: А.Пацэнка, В.Лучко, А.Майсяёнак, Д.Бічэль-Загнетава, С.Астраўцоў, А.Мілянкевіч, В.Шалкевіч, Ю.Гумянюк ды інш.
Дэкляраваная мэта дзейнасьці клюбу - зьвярнуць увагу грамадзтва на сапраўдны стан аховы помнікаў, культурнай і духоўнай спадчыны Горадні і вобласьці.
Сябры клюбу праводзілі акцыі па ўпарадкаваньні і захаваньні гістарычных месцаў Гарадзеншчыны. Так, дзякуючы «паходненцам», быў уратаваны будынак Гістарычнага архіву, ачышчаная рака Гараднічанка, адноўлены гадзіньнік на Фарным касьцёле, вернутыя некаторым гарадзенскім вуліцам старыя назовы, упарадкаваныя могілкі да Дня памяці. Адзін з накірункаў дзейнасьці П. - правядзеньне культурна-асьветніцкіх мерапрыемстваў. Сябры суполкі выдавалі газэту «Рэанімова», ладзілі тэматычныя вечары, лекцыі для жыхароў Горадні, сустрэчы зь беларускімі дзеячамі: А.Пяткевічам, А.Трусавым, Ю.Хадыкам, А.Карпюком, братамі Грыцкевічамі, А.Мальдзісам; праводзілі фэсты беларускай рок-музыкі і самадзейнай песьні, наладзілі сьвяткаваньне 300-годзьдзя аптэкі (гісторыка-архітэктурнага помніка); прадпрымалі краязнаўчыя вандроўкі па Гарадзеншчыне і па-за яе межамі: у Гудзевічы, Зэльву, Гальшанскі замак, па памятных месцах Ф.Багушэвіча, Якуба Коласа, М.Багдановіча, Янкі Купалы і інш.
Напрыканцы 1980-х клюб П. стаў адным з уплывовых сябраў Канфэдэрацыі Беларускіх Суполак, многія «паходненцы» ўдзельнічалі ў стварэньні «Мартыралёгу Беларусі» і БНФ.
Кр.: 1. ANH. F-3/T; 2. ANH. F-9/4(8).
Літ.: 3. Клуб «Паходня» (інтэрв'ю М.Ткачова Н.Палуцкай) // Гродненский университет. № 7, 01.03.1988; 4. С.Крапивин. Факел и сквозняки // Советская Белоруссия. 13.09.1988; 5. М.Багадзяж. У адзінай плыні // Чырвоная змена. 23.11.1988; 6. «Паходня» - значит «факел» // Советская культура (Масква). 04.02.1989.
Ларыса Андросік
