Скончыў Беларускі інстытут інжынэраў чыгуначнага транспарту. Ад пачатку ўтварэньня гомельскай «Талакі» (першая палова 1986) да 1990 быў яе старшынём. Рэпрэзэнтаваў «Талаку» ў Канфэдэрацыі Беларускіх Суполак. Зь ягоным удзелам у Гомелі быў створаны Каардынацыйны Цэнтар у Падтрымку Перабудовы, куды ўваходзілі нефармальныя суполкі гораду. Каардынацыйны Цэнтар ладзіў пікеты па зборы подпісаў вернікаў аб перадачы Петра-Паўлаўскага сабора вернікам (пачынаючы з 1987); ладзіліся жалобныя пікеты і мітынгі ў Гомелі, прысьвечаныя Чарнобыльскай катастрофе, зьбіраліся подпісы за адкрыцьцё беларускіх клясаў (здолелі дамагчыся адкрыцьця беларускай нацыянальнай школы ў Палацы моладзі «Гомсельмаш»). Разам з «Талакой» удзельнічаў у водным ралі па Дзьвіне супраць будаўніцтва Дзьвінскай (Даўгаўпілскай) ГЭС, па Прыпяці супраць мэліярацыі Палесься. Быў адным з арганізатараў у Гомелі БНФ, ТБМ. Арганізоўваў у Гомелі аддзяленьне Беларускай Нацыянальна-Дэмакратычнай Партыі, Беларуска-Хрысьціянскай Злучанасьці. У сувязі са сваёй актыўнай грамадзкай пазыцыяй шмат разоў перасьледаваўся з боку ўладаў. Нэгатыўныя матэрыялы зьяўляліся ў «Мэтадычных дапаможніках для службовага карыстаньня работнікаў апарату абкаму партыі г. Гомеля», «Гомельскай праўдзе» і інш.
Я. таксама вядомы як публіцыст і выдавец. У 1990 у Гомелі пачала выдавацца газэта «Атава», дзе Я. быў рэдактарам і аўтарам. Таксама друкаваўся ў газэтах «Навіны БНФ», «Свабода», «Наша Ніва».
Кр.: 1. ANH. F-3 (Алесь Яўсеенка).
Галіна Кацуба
