У дзяцінстве разам з бацькамі пераехаў у Менск. У 1976 годзе скончыў сярэднюю школу, працаваў на заводзе «Гарызонт», выпускным у газэце «На страже Октября». З 1979 па 1984 вучыўся на журфаку БДУ. Падчас вучобы Д. стаў адным з заснавальнікаў моладзевага аб'яднаньня Беларуская Сьпеўна-Драматычная Майстроўня. За актыўны ўдзел у акцыях «Майстроўні» Д. некалькі разоў быў затрыманы міліцыяй і атрымаў вымовы па камсамольскай лініі.
Пасьля заканчэньня ўнівэрсытэту працаваў малодшым рэдактарам рэдакцыі літаратуры БелСЭ. Потым выехаў у Гомель, дзе працаваў у рэдакцыі абласной газэты «Гомельская праўда». З 1987, жывучы ў Маладэчне, працаваў у аддзеле крытыкі і мастацтва часопіса «Нёман». З 1990 году жыве ў Вільні. Узнагароджаны мэдалём Летувіскае Рэспублікі «13 студзеня» за адвагу і самаахвярнасьць, праяўленыя пры абароне незалежнасьці Летувы.
Літаратурную дзейнасьць пачаў у «самвыдаце». Падчас службы ў войску выконваў абавязкі карэспандэнта дывізійнае газэты «Боевой призыв», якая знаходзілася на тэрыторыі Менскага апэратыўнага палка («Белполк»). На рэдакцыйнай машынцы Д. друкаваў самвыдавецкую газэту «Люстра дзён», якую пачаў выдаваць разам з Вінцуком Вячоркам і Сяргеем Сокалавым, пад калектыўным псэўдонімам «Беларуская талеранцыйная грамада» ў 1980.
У 1984 у Слоніме разам зь Сяргеям Астраўцовым выдаюць літаратурную газэту «Набойні», дзе зьмяшчаюць свае творы. У 1986 разам з талакоўцамі выпускаў скандальны «Бурачок». У 1988 Д. разам з Алесем Бяляцкім пачынаюць выдаваць бюлетэнь Таварыства маладых літаратараў «Тутэйшыя» - «Кантроль». У 1989 Д. - рэдактар альманаху «Літаратура», таксама ўдзельнічае ў выдаваньні газэты «Навіны БНФ». Абіраўся сябрам Сойму БНФ.
У 1990-1991 - рэдактар газэты «Свабода». З 1991 - галоўны рэдактар адноўленае «Нашае Нівы».
Друкаваўся ў зборніках «Дзень паэзіі», «З гісторыяй на Вы», «Вобраз», часопісах «Полымя», «Нёман», «Крыніца», у «Литературной газете». Напісаў прадмовы да кнігаў «Мур» Ж.-П.Сартра (1991), «Адвечным шляхам» І.Абдзіраловіча (1993), пераклаў гэты твор на расейскую мову для «Нёмана».
Кр.: 1. АМН. F-3.
Тв.: 2. Практыкаваньні: Проза, эсэ, крытыка. - Менск, 1992; 3. Русская книга. - Менск, 1998; 4. Дзёньнік прыватнага чалавека. - Менск, 1998.
Літ.: 5. Юрась Залозка. Версіі. - Менск, 1995. С. 371-407.
Ларыса Андросік
