У Беларусі станаўленне культуры Адраджэння было абумоўлена шырокім развіццём таварна-рыначных адносін, ростам гандлёвых гарадоў эўрапейскага тыпу, арганізаваных на прынцыпах самакіравання паводле магдэбургскага права, адносным дэмакратызмам дзяржаўнага ладу, завяршэннем працэсу фармавання беларускага этнасу і старабеларускай мовы. Тыповыя рысы рэнесанснай культуры найбольш выразна праявіліся ў навуковай і культурна-асветніцкай дзейнасці Францішка Скарыны, які заклаў падмурак беларускага гуманізму і талерантнасці, пакінуў нашчадкам яскравыя ўзоры патрыятызму і самаахвярнага служэння Бацькаўшчыне. Важкі ўклад у распрацоўку ідэалаў дабра, высокай духоўнасці, нацыянальнай самасвядомасці, павагі да людзей іншых нацыянальнасцей і краін свету ўнеслі Мікола Гусоўскі, Міхаіл Літвін, Сымон Будны, Васіль Цяпінскі, Андрэй Волан, Мялецій Сматрыцкі, Стафан Зізаній і Лаўрэнцій Зізаній, Сімяон Полацкі, Ю.Даманеўскі, Л.Карповіч і інш. Беларускія мысліцелі-гуманісты падзялялі нацыянальна-дзяржаўную дактрыну новага часу, прызнавалі права кожнага народа на самастойнае палітычнае і культурнае развіццё. Новыя погляды на чалавечае грамадства яны спалучалі з пошукам найлепшых формаў дзяржаўнага ўпарадкавання і дэмакратычнай сістэмы кіравання. Пра гэта сведчаць унікальныя помнікі тагачаснага права - Статуты Вялікага Княства Літоўскага 1529, 1566 і 1588, у якіх прапаведавалася ідэя прававой дзяржавы, абвешчаны прынцыпы вяршэнства закону, урадавай абароны правоў і свабод чалавека. Характэрным было і тое, што паўсюдна арганізоўваліся шматлікія беларускія брацтвы, закладваліся друкарні, адкрываліся школы, вышэйшыя навучальныя ўстановы, расла цікавасць да культурна-філасофскіх каштоўнасцей, узмацняліся мецэнацкія тэндэнцыі, пашыраліся ідэі гуманізму і рэфармацыі, ішло станаўленне беларускай мовы, нацыянальнай пісьменнасці, літаратуры, мастацтва. Усё гэта, як адзначаў Максім Багдановіч, вылучыла Беларусь на адно з першых месцаў сярод культурнага славянства, збліжала яе ў эканамічных і культурных адносінах з Заходняй Эўропай.
Паведаміць пра недакладнасьць