быдліна -ы, ж. Жывёліна.
Надышлі гады жыццёвага амбарасу і бясконца дурнога клопату - і знішчылі творчую радасць, растапталі дыямант у пабітым шкле, з паэта зрабілі быдліну. (М.Гарэцкі)

быдлятка -а, н., ласк. Асобіна буйной рагатай жывёлы.
Забаранілі нам карміць жывёлу. Цэлы тыдзень чуваць было рыканне скаціны. Быдляткі шалелі ад голаду, грызлі яслі, церліся аб сцены і здыхалі. (ЛіМ. 26.08.1994)

быдта, бытта злучн. Быццам.
Абудзіла яе, прашмыгнуўшы ў міг вока каля самага берага, сіння блішчастая пташка з кароткім, быдта выскубленым, хвастом. (В.Адамчык) Дзяцей бытта хто падмяніў. (А.Разанаў)

быліца -ы, ж. Быль.
Успомніў быліцу ці выдумку майго сябра скульптара. (Я.Скрыган)

былы -ая, -ое. Які быў, мінуў.
У даўно былыя даты - нават следу не пазнаць. (А.Разанаў)

быццёвы -ая, -ае. Які мае адносіны да быцця.
Беларушчына стамілася існаваць адно ў слове. Стагоддзе толькі вербальнага статусу культуры, відаць, вычарпала нейкі быццёвы ліміт, скарыстала ўсе дадзеныя натуральныя правы на існаванне. (ЛіМ. 20.01.1995)

бязвартасны -ая, -ае. Які не мае вартасці, кошту.
Бязвартаснымі паперамі - рублямі - закідалі Беларусь і скардзяцца: усё даражэе. (ЛіМ. 30.07.1993)

бязверац -рца, м. Той, хто не верыць у Бога.
Нязрушны, непрабойны, сказана ўжо, бязверац, які не трымае ў памяці ніводнай малітвы, я бясслоўна... малюся. (У.Мехаў)

бязвыйсцевы -ая, -ае. Які не мае выйсця.
Ды на бязвыйсцевай дарозе у неспагаднай старане у вокны радасць не зірне... (А.Салавей)

бязгодзіца -ы, ж. Непагадзь, непагода.
Надвор'е хмарнае. Часта курыцца дожджык. А яны не заўважаюць прыкрай бязгодзіцы. (М.Гарэцкі)

бязладак -дку, м., бязладзіца -ы, ж. Бязладдзе.
Бязладак ля хацін. (ЛіМ. 08.10.1971) Бязладзіца, непарадкі агарнулі круом, як чорнаю хмараю. (Я.Лёсік)

бязмежжа -а, н. Становішча, калі парушаюцца ўсе прававыя і маральныя нормы.
Падобныя «разборкі» паміж дзвюма галінамі выканаўчай улады не садзейнічаюць прэстыжу апошняй і ствараюць самае сапраўднае бязмежжа. (Звязда. 24.07.1993)