Грамніцы
завыць як воўк на Грамніцы. Гл. воўк.
як воўк на Грамніцы. Гл. воўк.

граць
Бяда не дуда: пішчыць, а не грае. Гл. дуда.
гаварыць як у скрыпку граць. Гл. скрыпка.
ткаць кросна бу ў скрыпку граць. Гл. скрыпка.

гроб, гл. таксама дамавіна, труна
цёмна (ціха) як у гробе. Ваўк. п., Мсцісл., Слон. Пра абсалютную цемру і цішыню. Federowski, 59; Высл., 415; Янк., 439; Юрчанка 1977, 246.

Гродна
як Гродна. Зэльв. Жарт.-іран. Пра каго-н., што-н. вельмі старых. Даніловіч, 218.

гром
баба [тоўстая] як гром. Сміл. Захапл. Пра моцную, мажную кабету. Шатэрнік, 278; Янк., Пар., 12.
навіна як гром з яснага неба звалілася. Стаўб. Мяц., 310. Тое, што як гром з яснага неба.
скаціцца як гром. Пра некага або нешта, што звалілася з рэзкім гукам. Ройзензон, 77.
уляцець у хату як гром з неба. Рэч. Пра чыё-н. раптоўнае, неспадзяванае з'яўленне. ЛЦ, 125.
як гром з яснага неба. Ашм., Клецк. Пра неспадзяваную, раптоўную вестку. МК, 310; СПЗБ 1, 481.
як гром за маладнёю. Мсцісл. Пра чыё-н. абавязковае з'яўленне. Юрчанка, 182.
як калядный гром. Мсцісл. Жарт. Пра нешта зусім не страшнае. Юрчанка, 185.
баяцца вады як чорт грому. Гл. чорт.
баяцца як грому. Пра вельмі моцны страх. НН 1911, 590.

грош
нос як за грош. Ваўк. п. Насмешл. Пра не вельмі прыгожы нос. Federowski, 205.
як за грош абаранак. Ваўк. п., Слон. п. Пра зразумелую, лагічную цану. Dybowski, 10; Federowski, 1, 316.
плаваць як тапор за пяць грошай. Гл. тапор.
праўды ў каго як у жабрака грошай. Гл. жабрак.
такі харошы як люлька за тры грошы. Гл. люлька.
такі харошы як лялька за тры грошы. Гл. лялька.
харошы як драпянка за тры грошы. Гл. драпянка.
харошы як цукерка за два грошы. Гл. цукерка.
як тры грошы даць. Гродз., Слуц. Няўхв. Пра нядобразычлівы, злосны погляд. Носович, 115; Нос., 128; Сержпутоўскі 1999, 39, 137; Даніловіч, 255.

груган, гурган
абіраць як груган косці. Смарг. Асудж. Пра поўнае рабаванне. ФА.
назлятацца як груганы. Асудж. Пра нейкі актыўны збор дзеля непрыгожай справы, з карыслівымі мэтамі. Янк., Пар., 110.
пазлятацца як груганы на падлу (на пакорм). Барыс. Высл., 359; Янк., Пар., 123. Тое ж.
стаяць як гурган над ім. Смал. Няўхв. Пра пастаяннае адчуванне небяспекі ад каго-н. СЦБ, 267.

груд
аднаму ідзе як па масле, а другому як па грудзі. Гл. масла.

грудзі
як камень з грудзей ссунуўся. Гл. камень.

груз
ляжаць мёртвым грузам. Няўхв. Пра нешта, што застаецца непатрэбным, некарыстаным. БПФС, 73.

грузд
як грузд. Мсцісл. Ухв. Пра здаровага, добра складзенага чалавека. Юрчанка, 182.

груздзік
як груздзік. Памянш.-ласк. Мсцісл. Ухв. Пра здаровага, добра складзенага хлопчыка. Юрчанка, 182.

груздзіла
трэба як сабаку (для сабакі) груздзіла. Гл. сабака.

груша
назбіраць як на вярбе груш назрываць. Іран. Пра безвыніковае, дарэмнае збіранне. Янк., Пар., 110.
наліцца як груша. Слон. Пра моцнае распуханне. КВДУ.
уросшы як груша ў мяжу. Беласточчына. Пра моцнае трыманне за якое-н. месца, прывязанасць да роднага куточка. «Ніва», 1973, № 50.
Любі дзіця як душу, а калаці як грушу. Гл. душа.
улюбіцца (утрэскацца) як чорт у сухую грушу. Гл. чорт.
Шкадуй як душу, калаці як грушу. Гл. душа.
як чорт сухую грушу: засуша, засуша, а тады і любіць. Гл. чорт.
прывязацца як чорт да старой ігрушы. Гл. чорт.

грушка
гэта так як на вярбе грушкі. Гл. вярба.
Любі дзіця як душку і калаці як грушку. Гл. душка.

грыб
Век пражыць як салёны грыб праглынуць. Ваўк. Прык. Пра адчуванне хуткасці часу. Янк., 157; Даніловіч 1997, 131.
згніць бы разлезлы грыб. Слуцк. Няўхв. Пра прападанне, гніенне, псаванне нечага. Сержпутоўскі 2000, 180.
зморшчыцца як грыб на сонцы. Мін. Здзекл., іран. Пра старэнне, маршчыністы твар. ЛЦ, 70.
ламацца як здобны грыб. Карэл. 1. Пра тое, што хутка губляе прыгожы знешні выгляд, крышыцца, ламаецца. 2. Насмешл. Пра чалавека, які капрызнічае, нешта з сябе выстаўляе. Высл., 340. ≺ Здобны грыб - баравік.
разлезлы як стары грыб. Івац. Няўхв. Пра старога нямоглага чалавека. Янк., 424; ЗЗайкі.
раскіснуць як стары грыб. Івац. Няўхв. ЗЗайкі. Тое ж.
сядзець як грыб пад ігліцай. Рэч. Пра чыё-н. спакойнае, забяспечанае месца, становішча. Pietkiewicz, 371.
трухлявы як грыб. Дзятл. Няўхв. Пра старога нямоглага чалавека. СПЗБ 5, 133.
як грыб гнілы. Маладз. Няўхв. Пра нядужага, слабага чалавека. СЦБ, 102.
прыстаць як слімак да грыба. Гл. слімак.
седзець як грыбу ў порослі. Пра надзейнае становішча. ТС 4, 184.
вусны як грыбы. Ушацк. Няўхв. Пра тоўстыя непрыгожыя, часта надутыя вусны. Скарбы, 134.
дзеці растуць як грыбы. Лід. Пра хуткі, непрыкметны рост дзяцей. АВНЛ.
дзяўчата так хутка растуць як грыбы пасля дажджу. Івац., Тал. Пра хуткае падрастанне дзяўчат. Federowski, 95; МК, 18; ЗЗайкі.
Хлопцы ростуць ек грыбы, а дзеўкі - ек бабкі. Стол. Прык. ТС 1, 32. ≺ Бабка - падбярозавік. Тое, што дзеці растуць як грыбы.

грыбок
ужо малочнічкі лезуць як тыя грыбкі ў лесі. Памянш. Клецк. Пра хуткі рост дзіцячых зубоў. ДА.

грыбочак
Дару пянёчкі, каб дзеці раслі як грыбочкі. Памянш.-ласк. Вясельнае пажаданне здаровых дзяцей. БВ, 67.

грывеннік
як новый грывеннік. Мсцісл. Іран. Пра задаволенага чалавека. Юрчанка, 192.

грызці
чытаць як рэпу грызці (сячы). Гл. рэпа.
як рэпу грызе, так лае. Гл. рэпа.
задачкі рашаець як рэпу грызець. Гл. рэпа.