скаба
худая як скаба. Астр. Няўхв. Пра худую жанчыну ці карову, іншую жывёлу. СПЗБ 4, 433. ≺ Скаба - рабро.

скабка
як скабка. Жлоб. Няўхв. Пра жанчыну, якая хоча пра ўсё ведаць, імкнецца ўсюды патрапіць. Мат. Гом., VIII, 147. ≺ Скабка - стрэмка.

скаварада
як скаварада. Гом. Пра нешта вялікае, круглае, часцей пра кветку. Матэрыялы 1981, 114.
горача дзе як на скаварадзе. Пра гарачыню. Янк., Пар., 43.
падскокваць быццам на гарачай скаварадзе. Брэсц. Насмешл. Пра чалавека, які падскоквае, перапоўнены эмоцыямі. ЛЦ, 73.
скакаць баццэ гарох на гарачай скаварадзе. Гл. гарох.
падскокваць як крась на скаўрадзе. Гл. крась.
круціцца (віцца, вярцецца) як уюн на [гарачай] патэльні (скаўрадзе, скаварадзе). Гл. уюн.
бы гад на сковороді. Гл. гад.

скажэнны
бегаць як скажэнны. Бран. Няўхв. Пра чалавека, які мітусіцца, носіцца як хворы. Бялькевіч, 338; Расторгуев, 240.
крычаць як скажэнны. Касц. Няўхв. Пра чалавека, які моцна крычыць. Бялькевіч, 406.
ляцець як скажэнны. Касц. Няўхв. Пра чалавека, які мітусіцца, імкліва бяжыць. Бялькевіч, 256.
насіцца як скажэнны. Лоеў. Няўхв. Янкова, 325. Тое ж.

сказаць
хутка як слова сказаць. Гл. слова.
як аман сказаць. Гл. аман.

скакаць
жыццё як у таго вераб'я: скача па сцежцы ды гаўно клюе. Гл. верабей.
У міру як на вялікім піру: хто скача, а хто і плача. Гл. пір.
згорбіцца як мядзведзь скачучы. Гл. мядзведзь.

скакун
блішчаць як падкова ў скакуна. Гл. падкова.

скала
бабка цвёрдая як скала. Смарг. Ухв. Пра моцна загартаванае малое кавадлачка для кляпання касы. СПЗБ 5, 341.
Жыць на чужой старонцы, як на скале адзінокай сасонцы. Добр. Прык. Фальк. Спачув. Пра цяжкае жыццё на чужыне. ПП 1, 291.

скалка
грошай як у чорта скалак. Гл. чорт.

скамарох
Усяк пляша, ды не як скамарох. Прык. Пра тое, што кожны нешта робіць, але не так добра, як спецыяліст. Ром., Зап., I, 215.

скамянелы
як скамянелы. Пра чалавека, які, уражаны, знерухомеў. Санько, 213.

скарбовы
здаровы (здараўляка, крэпкі, моцны) як дуб [скарбовы]. Гл. дуб.

скаўт
худы як скаут. Асіп. Няўхв. Пра худога касцістага чалавека. Высл., 414. ≺ Скаўт - магчыма, склют.

скаціна
Грошы - не мякіна, а чалавек не скаціна. Гл. мякіна.
з болю як скаціна б'юся. Слон. п. Чалавек пра сябе: ад болю ён траціць кантроль, развагу. Federowski, 41.
Хата бэз дытыны як хлів бэз скотыны. Гл. хлеў.

скварка/шкварка
высмажыцца як скварка. Спачув. Пра чалавека, які схуднеў, спрацаваўся моцна. Янк., Пар., 32.
скіпець як скварка. Ваўк. п. Спачув. Federowski, 279. ≺ Скіпець - стаяць. Тое, што высмажыцца як скварка.
Дождж на Марка, дык зямля як скварка. Народная прыкмета. Пра дождж у пару. ФА.
Цэла - не скварка, капусту не заправіш. Прык. Жарт. Пра невялікую матэрыяльную карысць цнатлівасці маладой на вяселлі. Козенка, 148.
настрашыць як ката скваркаю. Гл. кот.
праўда як лісіца на леташнім ламе скваркі пякла. Гл. лісіца.
насіць як на відэльцы скварку. Гл. відэлец.
Праўда не шкварка - з блінамі не з'ясі. Астр. Прык. Пра немагчымасць прыхаваць праўду. ПП 2, 433.
напужаць як ката шкваркаю. Гл. кот.

скіба
пырысяты як скіб'ё. Мсцісл. Ухв. Пра сытых дагледжаных парасят. Юрчанка 1998, 147.

скіданы
дзеўка як віламі скіданая. Гл. вілы.

скінуць
Жаніцьба не лапаць - з нагі не скінеш. Гл. лапаць.
Жонка не бот - не скінеш. Гл. бот.
Прывычка не атопак: з нагі не скінеш. Гл. атопак.
як вокам скінуць Гл. вока.
як ката з печы скінуць. Гл. кот.
як торбу з плеч скінуць. Гл. торба.

скітнік
седеть як скітнік. Лоеў. Няўхв. Пра чалавека, які пасіўна сябе паводзіць, не цікавіцца актуальнымі праблемамі. Янкова, 327. ≺ Скітнік - бадзяга-бядняк.

склезень
худы як склезень. Ушацк. Няўхв. Пра некага худога. Барадулін, 90.