брызгель
вішань што брызгель. Слон. Пра вялікую колькасць вішань, чырвоных ягад. Высл., 293.

брысь
чырвоны як брысь. Слон. Ухв. Пра чырванашчокага, паўнатварага чалавека. Нар. слов., 32. ≺ Брысь - ужываецца выключна ў параўнанні.
як брысь. Мсцісл. Ухв. Пра здаровага моцнага чалавека. Юрчанка, 179.

брытва
вайстренный што брытва. Мсцісл. Пра нешта вельмі вострае. Юрчанка, 1993, 71.
востры (гостры) як брытва. Ваўк. п., Слон. Federowski, 113; Янк., 399; Высл., 294. Тое ж.
коса ярка шо брытва. Слон. Ухв. Пра вострую касу. ТС 5, 364.
язык як брытва. Івац., Слон., Мядз. Пра занадта востры язык. Высл., 424; ФА; ЗЗайкі.
Язык што брытва: як намылішся, то і пабрые. Касц., Хоц. Прык. Асудж. Пра занадта востры язык. ЛЦ, 66. Тое, што язык як брытва.
хадзіць як на брытвах. Ваўк. п., Бяроз. Пра асцярожную, напружаную хаду. Federowski, 48; АВНЛ.
як брытваю рэзаць. Мсцісл. 1. Пра хуткае і роўнае адразанне чаго-н. 2. Пра адкрытае, рэзкае выказванне сваёй думкі. Юрчанка 1998, 8.

брыць
касіць як брыць. Маст. Ухв. Пра дакладнае, чыстае, роўнае скошванне чаго-н. Сцяшковіч, 28.
лёгка жаніцца што лысага брыць. Гл. лысы.
лёгка як голага брыць. Гл. голы.

буба
малыі як буба. Кам. Пра нешта дробнае. ЖН, 38. ≺ Буба - ягады.

бубак
качацца як бубак. Краснап., Мсцісл. Няўхв. Пра гультаяватага чалавека, які толькі валяецца, а не працуе. Бялькевіч, 93; Юрчанка 1998, 178. ≺ Бубак - круглы шар.

бубен
бубнець і бубнець як [той] бубен. Уздз. Няўхв. Пра надакучлівую гаворку. ФА.
выган як бубен. Івац. Пра пусты, выгаралы на сонцы, выбіты капытамі жывёл выган. ЗЗайкі.
гаварыць як у бубен біць. Ваўк. п., Маз., Слуцк., Гродз., Малар. Пра моцную, гучную гаворку. Federowski, 108, 30; Высл., 300; Сержпутоўскі 1999, 3; Pietkiewicz, 311; Цыхун, 190; БД, 93.
гол[ы] як бубен. Ваўк. п., Слуцк., Ушацк. Пра голага, беднага чалавека. Federowski, 112; Сержпутоўскі 1999, 24; Шатэрнік, 36; Барадулін, 122.
лупіць як у бубен. Слон. Пра гучны стук. Высл., 341.
лысы як бубен. Насмешл. Пра безвалосую галаву. Янк., Пар., 97; СПЗБ 2, 698.
ударыць у звон як у бубен. Ваўк. п., Гродз. Пра гучны, звонкі гук звона. Federowski, 362; Цыхун, 190.
насіцца як чорт з бубнам. Гл. чорт.

бугай
дужы што бугай. Слон. Ухв. Пра дужага чалавека. Высл., 315.
розбуцецца як бугай. Стол. Насмешл. Пра чалавека, што раскрычаўся, разгаварыўся, разнерваваўся. ТС 4, 298. ≺ Розбуцецца - разгудзецца.
хадзіць як бугай. Карм., Стаўб. Асудж. Пра здаровага мужчыну, які свядома доўга не жэніцца. МК, 288.
хадзіць як трольскі бугай. Лельч. Няўхв. Пра здаравеннага гультая. Матэрыялы 1981, 129. ≺ Трольскі - пародзісты, здаровы.
як бугай хутка бегаць. Гродз. 1. Пра нейчы шпаркі бег. 2. Няўхв. Пра бегатню мужчыну ў стане сексуальнага запалення. Сцяшковіч, 613.
гізаваць як бугаі. Пін. Няўхв. Пра тых, хто бушуюць, не маючы куды дзяваць сілу. Нар. лекс., 109.
карак як у [таго] бугая. Лаг. Ухв. Пра моцны карак мужчыны. Высл., 334.
лоб як у бугая. Краснап. Пра высокі лоб. Бялькевіч, 246.
сілы як у бугая. Слон. Ухв. Высл., 382. Тое, што дужы што бугай.

буда
корова як буда. Кам. Ухв. Пра добрую вялікую карову. ЖН, 38.

будка
заседзецца дома як сабака ля будкі. Гл. сабака.

буза
шмат як бузы ў возеры. Пра вялікую колькасць чаго-н. Янк., Пар., 196.

бузіна
стаяць як бузіна ў полі. Люб. Спачув. Пра поўную самотнасць, адзіноту. ФА.

букатка
деўка як букатка. Смал. п. Пра поўную дзяўчыну. Добр., Смол., 43. ≺ Букатка - бочка.

булава
Галава не булава, мозгі не пілавіны. Прык. Пра абавязковасць розуму ў чалавека. Dybowski, 8.
галава як булава. Слон. Няўхв. Пра вялікую галаву. Высл., 302.

булка
шчокі як булкі. Слон. Ухв. Пра акругласць шчок. Высл., 423.
лёгка як нож у булку. Гл. нож.

бульба
очы навэрсы бы бульба. Няўхв. Пра вялікія вочы навыкаце. ЛА, 24.
пякуцца французы бы бульба ў прыску. Пра нягоды французаў у час напалеонаўскай кампаніі. Янк., 74.
разабрацца як повар з бульбай. Гл. повар.
цягнуцца як туман па бульбе. Гл. туман.
унадзіцца як свіння ў бульбу. Гл. свіння.
утравэцца ў гарод як вэпрык у бульбу. Гл. вэпрык.

бульбіна
нос як бульбіна. Лаг., Кір. Насмешл. Пра вялікі тоўсты нос. МК, 223; Янк., Пар., 115; ФА.

бульдозер
гарнуць (вярнуць) як бульдозер. Слон. Ухв. Пра заўзятую працу моцнага мужчыны. Высл, 307.

бунька
пропав як бунька на воді. Драг., Мёр. Пра нейчае бясследнае знікненне. Скарбы, 94; Нар. скарбы, 141. ≺ Бунька - бурбалка.

бура
падхваціцца як дурная бура. Мсцісл. Няўхв. Пра імпульсіўнага, неўраўнаважанага чалавека. Юрчанка 1969, 175.
як бура. 1. Ашм. Пра хуткага, імклівага чалавека. СПЗБ 1, 240; 2. Пра некага поўнага, вялікага. Юрчанка, 179.
як перад бураю ціш ды гладзь. Мсцісл. Пра злавесную, пагрозлівую цішыню, што можа закончыцца няшчасцем. Юрчанка 1977, 178.
пахіліцца як кветка ў буру. Гл. кветка.
таўчыся як хмары ў буру. Гл. хмара.