рэбры
высах хоць рэбры лічы. Пра схуднелага, ссохлага чалавека. Янкоўскі 1971, 111.

рэдзгіні, гл. рэзгіны

рэдзька
горкі як рэдзька. Віцеб. Няўхв. Пра нешта вельмі горкае. КВДУ.
сядзець як рэдзька на градцы. Брэсц. Жарт. 1. Пра чалавека, які недзе важна рассеўся. 2. Пра чалавека, які зацята маўчыць. ЛЦ, 123.
надаесці як горкая (паганая) рэдзька. Ваўк. п., Іўеў., Ушацк., Кобр., Люб., Івац., Пін. Няўхв. Пра нешта, што вельмі моцна надакучыла. Federowski, 194; Высл., 350; МК, 309; ФА; Ззайкі; БД, 308.

рэзаны
крычаць як рэзанае. Лаг., Слон. Няўхв. Пра чалавека, які надта моцна, прарэзліва крычыць. МК, 133; Высл., 338; Юрчанка 1977, 6.
раўсці як рэзаны. Івац., Карэл. Няўхв. Высл., 374; ЗЗайкі. Тое ж.

рэзаць
баліць як пілою хто рэжа. Гл. піла.
зараўсці баццэ каго рэжуць. Слуцк., Івац. Няўхв. Пра надта моцны крык каго-н. Сержпутоўскі 1998, 269; ЗЗайкі.
нож як вуда, да рэзаць ім худа. Гл. вуда.
як брытваю рэзаць. Гл. брытва.

рэзгіны
як рэдзгіні. Маст. Жарт. 1. Пра тканіну з рэдка сатканых нітак. 2. Пра парванае, з дзіркамі адзенне. Даніловіч, 244.
набраць як туману ў рэзгіны. Гл. туман.
як старыя рэзгіны. Ашм. Насмешл. Пра непрыгожага, нязграбнага, няўклюднага чалавека. Даніловіч, 253.

рэзь
жыць як баран да рэзі. Гл. баран.

рэмень
як рэмень. Мсцісл. Ухв. Пра моцную тканіну, пояс, шнурок. Юрчанка, 196.

рэпа
цубуля як репа. Мсцісл. Ухв. Пра вельмі вялікую ўраджайную цыбулю. Юрчанка 1993, 171.
здаровы бы рэпа. Слуцк. Ухв. Пра моцнага крамянога чалавека. Сержпутоўскі 1998, 289.
зубы як рэпа. Навагр. Ухв. Пра нейчыя белыя зубы. ФА.
як параная рэпа [смачна]. Пра нешта смачнае. Никифоровский, 146.
лаяць як рэпу грызці. Ваўк. п. Пра нейчую зграбную лаянку. Federowski, 169; Санько, 149.
мурзаты хоць рэпу сей. Ваўк. п. Насмешл. Пра некага крэпка мурзатага. Federowski, 190; Pietkiewicz, 371.
улезці як свіння ў рэпу. Гл. свіння.
чытаць як рэпу грызці (сячы). Ваўк., Слон. п., Шальч., Мін., Стаўб., Валож., Івац. Ухв. Пра добрае, беглае чытанне. Federowski, 71; Dybowski, 7; Мін.-Мал., 170, 171; МК, 317, 318; СПЗБ 5, 75; Высл., 430; ЗЗайкі.
як рэпу грызць. Лоеў., Мсцісл. Ухв. Пра добрае выкананне якой-н. справы. НН, 474; Dybowski, 6; Янкова, 315; Юрчанка 1977, 210, 218.
наесціся як свіння рэпы. Гл. свіння.

рэха
дружны як рэха. Пра неадлучнасць, неадчэпнасць кагосьці. Янк., Пар., 55.

рэшата
галава [стала] як рэшата. Стаўб., Слон. Няўхв. Пра чыю-н. дрэнную памяць. МК, 214; Высл., 302.
дзіравы як рэшата. Слон. Пра нейкі посуд, абутак, што прапускаюць вільгаць. Высл., 312.
дождж лье як з рэшата. Мін. Пра вялікі праліўны дождж. ЛЦ, 13.
жывот як гарбуз, а морда як рэшата. Гл. гарбуз.
крам як рэшата. Няўхв. Пра рэдкую недыхтоўную крамную тканіну. Янк., 411. ≺ Крам - купленая ў краме тканіна.
луста як рэшата. Дзярж. Пра вялікі кавалак хлеба, сала. Нар. слов., 25.
цячы як праз рэшата. Мядз. Няўхв. Пра дзіравую, ненадзейную страху, праз якую працякае дождж. ЗСалавей.
цячы як рэшата. Свісл., Мсцісл., Івац. Няўхв. Пра дзіравы посуд, дах, абутак і інш. Сцяшковіч, 245; Юрчанка 1977, 248; ЗЗайкі.
цячэ як у рэшата. Мсцісл. Пра дзіравую страху. Юрчанка 1998, 164.
Бога прасіць што рэшатам ваду насіць. Прык. Пра бяссэнсавасць пасіўнага спадзявання на Бога, удачу. ПП 2, 143.
многа як дзірак у рэшаце. Гл. дзірка.
праўда ў каго як у рэшаце вада. Воран., Круп., Мядз., Стол. Іран. Пра адсутнасць праўды ў каго-н. СПЗБ 4, 334; Даніловіч, 260; ТС 4, 214.
таўчыся як уюн у рэшаце. Гл. уюн.
шумець як рой пчол у рэшаце. Гл. рой.
шчасця ў каго як у рэшаце вады. Капатк. Іран. Пра адсутнасць шчасця ў каго-н. Высл., 391.