асабняк м. Хутар.
На ўсю ваколіцу німа ні аднаго асабняка. Абаляны Брасл.

асавік, асовік м., бат. Падасінавік.
Асавікі растуць толькі ў добрых лясах. Выдрэя Лёзн. А грыбоў колькі! І асавікі, і лісічкі, і грузды! Бачэйкава Беш. Сягоння асавікоў ні нашла. Каміншчына Глыб. Кума асавікоў набрала, дык цяпер ходзіць прадаець. Цімошкавва Міёр. Асовікі растуць у асінніку. Зубава Арш. Асовікі зараз параслі ды баравікі пракідаюцца. Стаўбцы Чаш., Зубава Арш., Ткачы Гар., Азярцы Глыб., Крынкі Лёзн., Абольцы Тал., Ваўчо Уш.

асаднік м. Агароднік, чалавек, які займаецца агародніцтвам.
Мой бацька асаднік, расціць гуркі. Грыцы Глыб.

асата ж., бат. Асот.
Асата запаланіла ўвесь агарод. Дамашы Брасл.

асачэнь м. Хлеб, спечаны ў вясковай печы.
Маці пякла раней асачэнь, а я ні ўмею. Коравічы Чаш.

асва ж., восвы мн. Аса.
Малое гудзе сабе пад нос, як асва ў акне. Арэхаўск Арш. Мяне ўкусіла асва, дык дажа была цемпература. Барсукі, Цясты В.-Дзв. Столькі восваў, што няма куды дзецца. Застарынне Беш., Малы Поўсвіж Леп., Замшына Лёзн., Муляры Паст., Загацце Чаш.

асвер м. Журавель калодзежа.
Асвер зламаўся ўчора, няма як вады набраць. Лазічы, Прыпернае, Сасноўка Глыб. Дзетка, асверам дастань вады. Гараўцы, Папшулі Міёр., Дражакі Гар., Залессе Глыб., Балаі Паст., Машчоны Сен., Бадзінава Пол., Загацце Чаш.

асвоіцца зак. Парадніцца, стаць сваяком.
Асвоіўся ты са мной, брат, раз на сястрэ жаніўся. Мішкавічы Шум.

аселіца ж. Нізкае, вільготнае месца каля вёскі; луг.
Каб патрапіць у вёску, трэба прайсці аселіцу. Шантары Докш. На аселіцы ў нас расце капуста. Пустаселле Докш. Снег растаў, аселіца стаіць у вадзе. Новыя Валосавічы Леп.

асеўкі, асіўкі мн. Высеўкі.
Якая мука плахая, адны асеўкі. Рускі Шум. Мука нічога памеліна, асевык пасьці німа. Барсукі Дубр., Зуі Лёзн. Мука добрая, калі асіўкаў зусім няма. Папшычы Глыб.
Параўн. ашакі

асіта ж. Дрыгва.
Калі пападзеш у асіту, ногі вязнуць. Пралетарыя Уш.

асіўкі гл. асеўкі

аскабалак, аскалёпак, аскялэбак, аскяробак м. Абломак чаго-н.
Прынёс нейкіх аскабалкаў - нада ж сасновыя палачкі. Гарадзец Шарк. Той аскалёпак валяецца пад нагамі які дзень. Кушлікі Паст. Маці запаліць аскалёпак і вяжа. Езярышча Гар. Толькі аскалёпкі пасыпаліся ад стакана. Гарадзец Шарк. Разбіла міску? А аскялэбкі хоць сабрала? Надазер'е Глыб. Аскяробкі ад тарэлкі рассыпаліся па ўсёй кухні. Пралетарыя Уш.
Параўн. ачароп'е

аскробкі толькі мн. Шалупінне ад бульбы.
А я аскробкі ні выкідваю, а аддаю свінням, яны тады і ядуць лепі. Лукашова Паст.
Параўн. ацяробкі, ацярэбкі, ашкалёпкі

аскупець зак. Стаць скупым.
Дык ты ж, братка, вельмі аскупеў пад старасць. Замошша Брасл.

аскялэбак, аскяробак гл. аскабалак

аслабадзіць зак.
1. Вызваліць; адваяваць захопленую ворагам тэрыторыю.
Аслабадзілі нас у сорак чацвёртым году. Пушкі Лёзн. Нашу вёску аслабадзілі парцізаны. Калышкі Лёзн. Красныя аслабадзілі нас ад немцаў. Галбея Паст.
2. Вызваліць з няволі, даць свабоду.
Як нас аслабадзілі з лагера, дык мы ў ету дзірэўню прыехалі жыць. Салаўёва Лёзн.
3. Выслабаніць што-н. ад чаго-н.
Хоць ты аслабадзі засек, зярно ж сыпаць нада. Воўкаўшчына Глыб.

асляпень м. Авадзень.
Кароў асляпені заідаюць. Шклянцы Докш.
Параўн. авад 1

асмалак м. Смаляк, смалісты кавалак дрэва.
Прынесі асмалак печ падтапіць. Ілава Шум.

асмалкі мн. Прыгаркі.
Вельмі асмалкі люблю, але каб не зусім чорныя. Антонаўцы Брасл. У печы бульба варыцца, дастанеш, а самае смачнае - асмалкі. Папкі Міёр.