крыса, гл. таксама пацук
як крыса. Мсцісл. Няўхв. Пра пранырлівага хцівага чалавека. Юрчанка, 188.

крыца
як крыцаю сесці. Пра супыненне актыўнасці, супакойванне каго-н. Санько, 69.

крышталь
вада [чыстая] як крышталь. Смал. п., Сміл. Ухв. Пра вельмі чыстую ваду. Добр., Слов, 967; Шатэрнік, 140.
чысты як крышталь. Ваўк. п. Ухв. Пра нешта чыстае, высокага гатунку: посуд, паветра і г. д. Federowski, 71.

крэмень
Баба бы крамень: ні з якога боку яе не ўкусіш. Слуцк. Прык. Жарт. Пра кабету, што аніяк не адгукаецца на чыесьці залёты. Сержпутоўскі 2000, 89.
як крэмэнь. Мсцісл. Ухв. Пра здаровага дужага чалавека. Юрчанка, 188.

крэсіва
як крэсівам выкрасіў [усю праўду]. Ваўк. п. Пра здабыванне, раскрыванне праўды. Federowski, 245.

крэсла
круціцца як чорт у круглым крэсле. Гл. чорт.

крэта
белы як крэта. Гродз. Пра бледнага чалавека. Сцяшковіч, 578. ≺ Крэта - крэйда.

ксёндз
пакрапіць як ксёндз крапілам. Пра дожджык, які ледзь-ледзь пакапаў. Ваўк. п. Federowski, 213.
паліць як ксёндз крапідлам. Воран., Іўеў., Шчуч. Няўхв. Даніловіч, 231. Тое ж.
памагчы як ксёндз Магдалене. Гродз., Маст. Іран. Пра адсутнасць дапамогі. Даніловіч, 231.
правіць як ксёндз з казальніцы. Ваўк. п. Ухв. Пра складную разумную гаворку некага, прамову. Federowski, 247. ≺ Казальніца - балкончык у касцёле, адкуль ксёндз выступае са сваімі прамовамі.
угадзіць як ксёндз Магдулі. Гродз., Карэл. Іран. Пра сітуацыю, калі не толькі не дагадзілі, але і паздзекваліся. Высл., 403; Цыхун, 180; Даніловіч, 231. ≺ Тлумачэнне інфарманта: «Зімой у лапцях хадзіла, а на весну валенкі купіў».
многа як у ксяндза жонак. Мін. Іран. Жарт. Пра поўную адсутнасць нечага. ЛЦ, 21.
у каго праўды як y папа з ксяндзом. Гл. поп.
распуціцца як ксяндзы ля вулляў. Стаўб. Пра прагных да спажывы людзей, якія згубілі асцярожнасць. Высл., 377.

ксёнжка
гаворыць як з ксёнжкі бярэ. Ваўк., Сак. п. Ухв. Пра красамоўнага чалавека. Federowski, 108.
кляне як з ксёнжкі бярэ. Ваўк. п. Насмешл. Пра надта складныя праклёны. Federowski, 145.

кубел
як кату сала: ніяк з кубла не дастаць. Гл. кот.

кубельнік
ехаць як кубельнікі. Мядз. Насмешл. Пра ціхую, асцярожную, няспешную язду. Нар. слов., 10. ≺ «Кубельнік усягды ехаў памалу, каб дабро ні растрасці, вот і сталі казаць на тых, што памалу ехалі: едуць як кубельнікі» (тлумачэнне збіральніка). Кубельнік - вясельны чын, той сват, што вязе кубел маладой у дом маладога.

кубло
дзе такі парадак як у буськавым кубле. Смарг. Іран. Пра непарадак у памяшканні. СПЗБ 4, 146.
купчыцца (кубліцца) як куры на кубле. Гл. курыца.
расце кублом. Лельч. Пра значную колькасць апенек, змешчаных шчыльна побач адзін ля аднаго. Кучук, Малюк, 64.

кудзеля
галава як кудзеля. Мсцісл. Няўхв. Пра непрычасаныя, неўпарадкаваныя валасы. Юрчанка 1998, 102.

кудла
як кудла [якая]. Мсцісл. Няўхв. Пра непрычасанага чалавека. Бялькевіч, 236.

кудлаты
багаты як сабака кудлаты. Гл. сабака.
Знаці, ой, знаці, што ён жанаты: скурчыўся, згорбіўся, як пёс кудлаты. Гл. пёс.
скорчыцца, зморшчыцца як цюцька кудлаты. Гл. цюцька.

кузня
белы як снег на кузьні. Гл. снег.
копаці як у кузні. Слон. Няўхв. Пра закопчанае памяшканне. Высл., 336.

Кузьма
пагуляць як Адэля ў Кузьмах. Гл. Адэля.
зарабіць як Меер на Кузьме. Гл. Меер.
ты такая радня як Саўка Кузьме родны Хведар. Гл. Саўка.

кука
стаяць як кука. Жытк. Няўхв. Пра разгубленага, нерухомага чалавека. ТС 2, 248.
сыты як кукамі збіты. Ушацк., Пол., Мядз. Пра ўкормленага, але дужага і не тлустага чалавека. МК, 312; Нар. лекс., 15; Барадулін, 97; СПЗБ 5, 59; Скарбы, 130.
рукі як кукі. Воран. Няўхв. Пра непрызвычаеныя, неахвочыя да працы рукі. Даніловіч, 231.
Рукі як кукі, а язык як у сукі. Прык. Зласл. Абразл. Пра жанчыну, няважную работніцу, але вельмі брахлівую і языкатую. ФА.

кукалка, гл. таксама лялька
як кукалка. Мсцісл. Памянш. Захапл. Пра прывабнага, прыгожа ўбранага чалавека. Юрчанка, 188.
як кукылку зьдзелыць. Памянш. Мсцісл. Ухв. Пра дасканалае выкананне нечага. Юрчанка 1993, 18.

кукарока
сядзець як кукарока. Мсцісл. Няўхв. Пра жанчыну ў нязграбнай, непрывабнай позе. Юрчанка 189.