кідаць
як у трасцы кідае. Гл. трасца.

кіёк
худенькая як [еты] кіёк. Памянш. Лоеў. Няўхв. Пра схуднелую, ссохлую жанчыну. Янкова, 157.
сядзець як на кійках. Мсцісл. Няўхв. Пра адзенне, што абвісае на худых станах. Юрчанка, 192.

кій
народу як кіем набіта. Ваўк. п. Пра перапоўненае людзьмі памяшканне. Federowski, 198.
як у старца кіёў. Гл. старац.
трымацца як на гнілым кіі. Смарг. Пра ненадзейную апору. Сцяшковіч, 616.
распусціцца як боскі кій. Насмешл. Пра чалавека, які занадта разышоўся, выйшаў з-пад кантролю. Высл., 377.
скрыўдзіў, усё роўна як бязногаму кій адняў. Гл. бязногі.
галава як на кію. Івац. Пра вяртлявага, хуткага чалавека. ЗЗайкі.
пусціць каго як сляпога без кія. Гл. сляпы.

кікімара
перанімаць як заморская кікімара. Мсцісл. Асудж. Пра чалавека, што безразважліва кагосьці капіруе. Бялькевіч, 226.
як кікімара балотная. Леп. Пагардл. Пра неахайную, дрэнна апранутую, непрывабную жанчыну. ЗВалодзінай.

кіла
бурчаць як кіла. Ваўк. п., Івац., Мёр. Няўхв. Пра бурклівага, незадаволенага чалавека. Federowski, 44; ЖН, 78; ЗЗайкі.
хадзіць як борахава кіла. Мсцісл. Насмешл. Здзекл. Пра нешта, што перакачваецца, пераліваецца з боку ў бок. Нар. лекс., 170.
толку з каго/чаго як з кілы мазгоў. Ушацк. Іран. Пра адсутнасць толку з каго-, чаго-н. Барадулін, 88.

кілавы
хадзіць (сунуцца, ісці) як кілавы. Слон. п., Карэл. Насмешл. Пра нязграбную, як раскірака, хаду. Federowski, 122, 293; Высл., 410.

кілбаса, гл. каўбаса

кінуць
як за плечы кінуў. Гл. плечы.
як вокам кінуць. Гл. вока.
ек поленом кінуць. Гл. палена.

кіпень
круціцца як муха ў кіпені. Гл. муха.

кіпець
бы ў гаршку кіпіць. Гл. гаршчок.
так веле мужык жонку любіць, як кісель на лаве кіпіць. Гл. кісель.

кіпцюр
дзярэцца ногцямі як кот кіпцюрамі. Гл. кот.

кіпяток
выскачыць як кіпятком аблітый (ашпараный). Мсцісл. Насмешл. Пра хуткае, імгненнае выскокванне адкуль-н. Юрчанка, 174.
угадзіць як сабацы кіпятком. Гл. сабака.
ускочыць як муха ў кіпяток. Гл. муха.

Кірзева
выскачыць як чорт з Кірзевай сажалкі. Гл. чорт.

кірмаш
лад як у Адэльску на кермашы. Гл. Адэльск.
круціцца як цыган на кермашы. Гл. цыган.
валіць народ як на кірмаш. Слон. Пра інтэнсіўны рух людзей. Высл., 291.
з'язджацца так як на кірмаш. Ваўк. п. Пра вялікі збор народу. Federowski, 356.
спяшацца як шавец на кірмаш за ботамі. Гл. шавец.
як бы кірмаш які кішыць. Пра вялікае, шумнае зборышча людзей. Тарас на Парнасе.
азірацца як сабака на кірмашу, згубіўшы гаспадара. Гл. сабака.
выкручвацца як цыган (шавец) на кірмашу. Гл. цыган.
галасаваць дзе як на кірмашу. Ваўк. п. Няўхв. Пра крык, гучную, голасную гамонку ў памяшканні. Federowski, 99.
як пасля кірмашу. Пра стомленега чалавека. Санько, 212.
гучна як на кірмашы. Пра вялікі шум, гаману, мітусню. Янк., Пар., 47.
загаманіць як жыды на кірмашы. Гл. жыд.
круціцца як жулік на кірмашы. Гл. жулік.
народу як на кірмашы. Слон. Пра вялікі збор народу. Высл., 353.
талака як на кірмашы. Ваўк. п. Пра вялікую колькасць народу, мітусню, таўкатню. Federowski, 310. ≺ Талака - тут: таўкатня.
шум як на кірмашы. Слон. Высл., 422. Тое, што гучна як на кірмашы.
як асёл на кірмашы. Гл. асёл.
як людзей на кірмашы. Слуцк. Пра мноства некага. Сержпутоўскі 1998, 241.

кірпічына
як асялку (для асялка) кірпічына. Гл. асялок.
трэба каму што як кірпічыне (для кірпічыны) асялок. Мсцісл. Іран. Пра поўную непатрэбнасць чаго-н. Юрчанка, 172.

кісель
збірацца як убогі на кісель. Гл. убогі.
папасці як муха ў кісель. Гл. муха.
папасці як мяла ў кісель. Гл. мяла.
спамогся як жабрак на кісель. Гл. жабрак.
так веле мужык жонку любіць, як кісель на лаве кіпіць. Жарт. Пра ілюзорнасць і непрацягласць кахання мужыка да жонкі. Federowski, 193.
трапіць як варона ў кісель. Гл. варона.
кешкацца як муха ў кісялю. Гл. муха.

кіслы
скрывіцца быццам укусіў кіслы яблык. Гл. яблык.
улезці (ублытацца) як чорт у гнілыя (у кіслыя) грыбы (бліны). Гл. чорт.

кісляк
ляжаць як кісляк. Воран. Няўхв. Пра нямоглага, састарэлага чалавека. СПЗБ 2, 466.

кітка
галава як гарохавая кітка. Касц. Пра курчавыя валасы. Бялькевіч, 239.

кішка
набрацца як Мурза кішак. Гл. Мурза.
цягнуцца як кішка. Івац., Карэл., Лаг., Слуцк. Няўхв. 1. Пра павольнае, маруднае перасоўванне, хаду. 2. Пра нешта доўгае, дакучлівае, заблытанае. Даніловіч, 230; Варлыга 1966, 92; Сержпутоўскі 1999, 65; ЗЗайкі.