сініца
як сініца на сучку. Мсцісл. Ухв. Пра зграбную дзяўчыну. Юрчанка, 180.
Дзеці гадаваць як сініцы камень кляваць. Стаўб. Прык. Пра цяжкасці гадавання дзяцей. ФА

сірата
жыць як сірата. Івац., Міл. Спачув. Пра чалавека, што жыве ў нястачы, беднасці. Бялькевіч, 226; ЗЗайкі.
нагаравацца як сірата. Пух. Спачув. Пра кагосьці, хто моцна нагараваўся. Мін.-Мал., 1970, 162.
такі дождж як сірата плача. Рэч. Пра спорны цёплы дождж. Высл., 397.

сіраціна
стаяць як сіраціна. Сміл. Спачув. Пра чалавека, які стаіць адзін, з прыгнечаным, забедаваным выглядам. Шатэрнік, 232.
Па чужыні - ек сіроціні. Жытк. Прык. Пра тое, што на чужыне ніхто не стане клапаціцца пра цябе, шкадаваць. ТС 5, 37.

сіта
бачыць як скрозь сіта. Лоеў. Пра чалавека з аслабленым зрокам. Янкова, 36.
дожджык трусіць (цярушыць) як праз (з) сіта. Краснап., Мін. Пра дробненькі, роўны дождж. Бялькевіч, 445; ЛЦ, 13. ≺ Трусіць - імжыць.
дзіравая галава як сіта. Няўхв. Пра нейчую не надта добрую памяць. ФСБМ 1, 250.

сітаўка
танканогі як сітаўка. Няўхв. Пра танканогага чалавека. Янк., 432. ≺ Сітка, сітаўка - пліска. Але, магчыма, тут параўнанне з ножкай грыба-махавіка (параўн. сітнік і сітавік на Пскоўшчыне - грыб махавік). Даль, Слов., 4, 189.

сітка
танканогі як сітка. Няўхв. Янк., 432. Тое ж.

скаба
худая як скаба. Астр. Няўхв. Пра худую жанчыну ці карову, іншую жывёлу. СПЗБ 4, 433. ≺ Скаба - рабро.

скабка
як скабка. Жлоб. Няўхв. Пра жанчыну, якая хоча пра ўсё ведаць, імкнецца ўсюды патрапіць. Мат. Гом., VIII, 147. ≺ Скабка - стрэмка.

скаварада
як скаварада. Гом. Пра нешта вялікае, круглае, часцей пра кветку. Матэрыялы 1981, 114.
горача дзе як на скаварадзе. Пра гарачыню. Янк., Пар., 43.
падскокваць быццам на гарачай скаварадзе. Брэсц. Насмешл. Пра чалавека, які падскоквае, перапоўнены эмоцыямі. ЛЦ, 73.
скакаць баццэ гарох на гарачай скаварадзе. Гл. гарох.
падскокваць як крась на скаўрадзе. Гл. крась.
круціцца (віцца, вярцецца) як уюн на [гарачай] патэльні (скаўрадзе, скаварадзе). Гл. уюн.
бы гад на сковороді. Гл. гад.

скажэнны
бегаць як скажэнны. Бран. Няўхв. Пра чалавека, які мітусіцца, носіцца як хворы. Бялькевіч, 338; Расторгуев, 240.
крычаць як скажэнны. Касц. Няўхв. Пра чалавека, які моцна крычыць. Бялькевіч, 406.
ляцець як скажэнны. Касц. Няўхв. Пра чалавека, які мітусіцца, імкліва бяжыць. Бялькевіч, 256.
насіцца як скажэнны. Лоеў. Няўхв. Янкова, 325. Тое ж.

сказаць
хутка як слова сказаць. Гл. слова.
як аман сказаць. Гл. аман.

скакаць
жыццё як у таго вераб'я: скача па сцежцы ды гаўно клюе. Гл. верабей.
У міру як на вялікім піру: хто скача, а хто і плача. Гл. пір.
згорбіцца як мядзведзь скачучы. Гл. мядзведзь.

скакун
блішчаць як падкова ў скакуна. Гл. падкова.

скала
бабка цвёрдая як скала. Смарг. Ухв. Пра моцна загартаванае малое кавадлачка для кляпання касы. СПЗБ 5, 341.
Жыць на чужой старонцы, як на скале адзінокай сасонцы. Добр. Прык. Фальк. Спачув. Пра цяжкае жыццё на чужыне. ПП 1, 291.

скалка
грошай як у чорта скалак. Гл. чорт.

скамарох
Усяк пляша, ды не як скамарох. Прык. Пра тое, што кожны нешта робіць, але не так добра, як спецыяліст. Ром., Зап., I, 215.

скамянелы
як скамянелы. Пра чалавека, які, уражаны, знерухомеў. Санько, 213.

скарбовы
здаровы (здараўляка, крэпкі, моцны) як дуб [скарбовы]. Гл. дуб.

скаўт
худы як скаут. Асіп. Няўхв. Пра худога касцістага чалавека. Высл., 414. ≺ Скаўт - магчыма, склют.

скаціна
Грошы - не мякіна, а чалавек не скаціна. Гл. мякіна.
з болю як скаціна б'юся. Слон. п. Чалавек пра сябе: ад болю ён траціць кантроль, развагу. Federowski, 41.
Хата бэз дытыны як хлів бэз скотыны. Гл. хлеў.