На запыт знайшлося 23 артыкулы

  1. 1
    Старасьць ні радасьць, і горб ні карысьць. — Прыказваюць старыя, калі пачынаюць слабець і горбіцца.
  2. 2
    Старац, старац, сяло гарыць! - Ніхай гарыць! - я ў другоя пірайду. — Аб тых, якія грамаду любяць толькі датуль, пакуль зь яе матар'яльную карысьць маюць.
  3. 3
    Старац старца нінавідзя, а гаспадар ніводнага. — Старац старца ненавідзе, бо яны канкурэнты. Гаспадар абодвух ня любе, бо яны хочуць жыць з працы гаспадара. Прыказваюць, калі два акупанты між сабой б'юцца, бо кажны хоча сабе падбіць адну й тую самую краіну. А народ, які жыве на гэтай зямлі, абодвух гэтых акупантаў ня любе, бо яны роўныя ягоныя ворагі.
  4. 4
    Старой бабца хораша й у шапца. — Даўней старыя беларускія жанчыны насілі каптуры - «шапкі». Старыя людзі хвасьлівых убораў не патрабуюць.
  5. 5
    Старой бабя й на печы ўхаба. — Калі нехта бяз важнай прыгоды бяду нажыве.
  6. 6
    Старому маніць, а багатаму красьці. — Няма каму аспрэчыць, калі стары маніць, бо ніхто ня помне таго часу, аб якім стары апавядае. Ніхто не павера, што багаты ўкраў, бо ў яго ўсяго шмат свайго.
  7. 7
    Староя хвалі ды за плот валі. Маладоя гудзь ды набудзь. — Выказваюцца аб старым працоўным статку. Жартам гэтак выказваецца й аб старых людзях. Гудзіць - ганіць.
  8. 8
    Старцу сяло ні наклад. — Аб тым, хто на малым прыбытку ня спыняецца.
  9. 9
    Стары вол баразны ня псуя. — Водклік аб старым фахоўцы, які мае багатую жыцьцёвую практыку й добра выканае сваю работу.
  10. 10
    Стары з мусту, а бізь яго пуста. — Калі ў хаце ёсьць старая людзіна. Хоць яна да працы й няздольная, але нейкую карысьць дае. Сэнс прыказкі: Старога карміць хлебам нібы й мус (з мусу), але ён карысны, бо хаты даглядае, у якой безь яго пуста.
  11. 11
    Стары як малы. — На старога, калі ён у чым памыліцца.
  12. 12
    Стаць дубам. — Калі конь станавіцца на заднія ногі.
  13. 13
    Стаць дубка. — Калі сабака станавіцца на заднія лапы.
  14. 14
    Стаць натарца. — Калі нехта напружваецца ды гатовіцца да змаганьня.
  15. 15
    Стаць рагача. — Калі нехта становіцца на галаве, а ногі трымае ўгору.
  16. 16
    Стаячаму лапаць падшывая. — Калі нейкі вырванец увачавідкі ашуквае.
  17. 17
    Сто коп (збожжа) - на год хлеба, і капа - на год хлеба. — Ці гаспадар нажне сто коп, ці адну капу, - усёроўна хлеба мусе хапіць на ўвесь год.
  18. 18
    Стол хлеба ні паесьць. — Кажа гаспадар, калі госьці яму заўважаць, што зашмат хлеба накроіў. Гэтым нібы кажацца, што хлеб накроены не для стала, а для гасьцей, каб госьці не падумалі, што гаспадар скупы.
  19. 19
    Стоць галавой. — Галавой проста ўніз.
  20. 20
    Сто чартоў гэткага ліха ні наробюць, як адна п'яная баба. — Калі п'яная жанчына лаецца ці няпрыстойныя песьні пяе.

Паведаміць пра недакладнасьць