Як прышло, так і пашло. — Калі нейкі прыбытак лёгка прыходзе дык ён марна й выдаткуецца.

Як пяюць, гэтак і адпіваюць. — Як мы будзем ставіцца да людзей, гэтак і людзі да нас.

Як робім, гэтак і маім. — Дабрабыт чалавека залежыць ад ягонай рупнасьці.

Як рукамі адняло. — Калі ад нейкага лячэньня чалавек раптам паправіцца.

Як сам сябе за сраку ні кусіў. — Калі нехта сам на сябе наракае.

Як свая вош укуся, дык тады парупіцца. — Аб нярупным дзяцюку ці нярупнай дзяўчыне. Калі ён ажэніцца ці яна замуж выйдзе, ды будуць мець сваю гаспадарку й сваю сям'ю, тады стануць ашчоднымі й рупнымі.

Як сеў, дык і прыкіпеў. — Прыказваюць пра таго (ці сам пра сябе), калі нехта сеў на кароткі час дый заседзеўся надоўга.

Як сірата плаче, дык ніхто ні бача, а як сірата засьмяецца, дык увесь сьвет здрыганецца. — Калі бедны гаруе, дык гэта нікога ня дзівіць. Калі-ж бедны пачне багацець, ці калі зь бядой папалам стаў выбівацца да лепшага жыцьця, дык усе із злосьцю пачынаюць яму зайздраваць і рабіць перашкоды.

Як сірбаў, так і сьцібаў. —
1. Калі чалавек быў добра накормлены, дык ён шмат і работы зрабіў.
2. Калі нехта быў добра падрыхтованы ці навучаны да нейкай працы, ці справы, дык ён добра будзе выконваць свае абавязкі.

Як трывога, тады да Бога. —
1. Калі чалавеку пагражае нейкая небясьпека, дык ён тады пачынае маліцца.
2. Калі нехта жыве спакойна, дык ён да нікога не зьвяртаецца, каб падзяліцца сваімі дасягненьнямі. А калі яму стане нешта пагражаць, нейкая бяда ці небясьпека, тады ён ходзе, шукае дапамогі ці парады.

Як тут, так і там, па калені жупан. — Прыказваюць, калі хочуць давесьці, што ўсюды аднолькава, як у хваленым месцы, так і тут.

Як у ступя ваду таўчы. — Аб пустой гутарцы ці аб бескарыснай рабоце.

Як у сук. — Калі нехта сказаў слова вельмі дарэчы.

Як хто хоча, так па сваім бацьку й плача. — Прыказваюць таму, хто пачынае ўмешвацца ў чужыя асабістыя ці хатнія соправы.

Як чорт у ваду перднуў. (Забурбаліла й сьціхла). — Калі нехта перад грамадой сказаў недарэчнае ці брыдотнае слова.