Гулі ні аднаго ў лапці абулі. — Перасьцярога маладым, каб не ўдаваліся ў празьмерныя гульні.

Гультай за работу, а мазоль за руку. — Калі гультай наракае на цяжкую работу, якая быццам яго ў калецтва ўганяе.

Гультай ляжыць, а доля бяжыць. — Прыказваюць, калі часам і гультаю пашанцуе.

Гультай сем рэчаў разгадая. — Калі гультая клічуць на работу, дык ён шмат прычынаў знойдзе на тое, каб не працаваць.

Гультаю хлеб на кію. — Гультая трэба кіям прыганяць да работы, каб зарабіў сабе на хлеб.