гаўкала — брахлівы сабака.
Ён жа такі гаўкала, ляпа не сцішаіцца.

гаціць — працаваць.
Ён гаціць на іх увесь век.

гбанікі — палазы ў санках, якія гнуць у адрозненне ад капанікаў.
Трэба ўмець выбраць лясіну на гбанікі, каб не сукаватая была.

гбацца — гнуцца.
Нага ня гбаецца, неяк хадзіць.

гваздкі — гваздзікі.
Ужо й гваздкі прабіліся, неўзабаве загарацца.

геройка — смелая.
Ты такой геройкай ня будзь.

гешэфт — справа, інтарэс.
Усё гешэфты нейкія водзіць з ім.
(Ад ідыш - здзелка.)

гібель — шмат, процьма.
Сёлета ягад гібель.

гілець, загілець — гарэць; яшчэ — дужа захацець.
Загілеў малец жаніцца, і слухаць нікога ня хочаць.
(Адсюль, відаць, і гіль, і карова чырвонае масці - Гілёня.)

гладка — зусім, ушчэнт.
Гладка забылася, чаго прышла сюды. Гладка збяднеў.

гладкі — укормлены, дагледжаны, спраўны.
Ад таго казак і гладак, што пад'еў і набак. Яна баба гладкая, спраўная.

гламызда — нязграбны, неахайны.
Такая ўжо гламызда, аж глядзець страшна.

глінабітка — хаціна з жэрдзя й гліны.
У глінабітцы зіму перажылі.

глінянік — гліняны гаршчок.
У гліняніку крупы лепі ўпрэюць.

глотнічаць — гарланіць, ірваць глотку.
Нячым глотнічаць, лепш справай займіся.

глушні — вушы (грэбліва).
Што табе - глушні пазаклала, што ня чуіш?

глыжы, глыжэўе, груд — засохлыя, зацвярдзелыя камякі зямлі.
Дождж як пашоў, глыжы пабіў, бульба ўзялася, пашла ў рост. Хто палку возьміць, а гэтыя дык грудам.

глык — глыток.
Піцця таго ўсяго на два глыкі.

глюганосы — глюгаты.
І прыляцеў глюганосы крук.

глюма — глюкаты; яшчэ — няветлы.
Глюма такая страшная сядзіць, слова ня скажа.