паляванне
На парабкаванні як на паляванні: што падстрэліў - тое і тваё. Глуск. Прык. Насмешл. Пра жыццё парабка «на падножным корме». Янк., Дыял., III, 162.
паўзці як самы з палявання. Гл. сом.
хлусіць бы прышоў з палявання. Слуцк. Насмешл. Пра хлуслівага чалавека. Сержпутоўскі 1999, 128.

паляцець
Варажба як стральба: куда паляціць, туды і загрыміць. Гл. стральба.
Дачка як ластаўка: пашчабечыць, пашчабечыць ды й паляціць. Гл. ластаўка.

паляшук
бояцца чаго як полешук воды. Жытк. Іран. Пра адсутнасць страху перад чым-н. ТС 4, 142.

памазаць
як мёдам памазана дзе. Ушацк. Няўхв. Пра месца, дзе чалавеку добра, утульна, куды ён імкнецца. Васюковіч, 19.
бы маслам памазаў. Гл. масла.
як салам каго памазаў. Гл. сала.

памак, гл. помак
намокнуць як памак. Чэрв. Пра чалавека, які моцна вымак пад дажджом. Нар. лекс., 65; СПЗБ 3, 374.
цяжкі як памак. Кір. Пра нешта вельмі важкае. Нар. слов., 71. ≺ Памак - намоклае бервяно, палена.

памаўза
маўчаць як памаўза. Ашм. Няўхв. Пра чалавека, што трымаецца не так, як трэба. СПЗБ 3, 376.

памерлы, гл. таксама умерлы
памагло як памерламу банкі. Хойн. Іран. Пра адсутнасць дапамогі наогул. Высл., 360.
Паможа вароне мыла як памерламу кадзіла. Прык. Пра немажлівасць змяніць прыродныя дадзеныя. Санько, 172.

памерці
трэба як сённі памерці. Лоеў. Іран. Пра нешта зусім непатрэбнае. Высл., 401.

памершы
ляжаць як памершы. Сміл. Пра людзей, што ляжаць нерухома, стомлена. Шатэрнік, 17; Federowski, 161.

памецены
пайсці як памецена. Ваўк. п. Пра хуткі сыход. Federowski, 211.

памешаны
хадзіць як памешаны. Мядз. Няўхв. Пра чалавека, які паводзіць сябе неадпаведна, дзіўна. СЦБ, 282.

памідор
чырвоны як памідор. Глыб. Ухв. 1. Пра нешта вельмі яркае. 2. Пра румянага чалавека. Высл., 420.
разбірацца як свіння ў памідорах. Гл. свіння.

памінкі
напіцца як дурны на памінках. Гл. дурны.
нажрацца як дурак на помінках. Гл. дурак.

паміраць
не хочацца як паміраць. Пра нешта, чаго вельмі не хочацца. Янк., Пар., 113.
трэба як заўтра паміраць. Гл. заўтра.

пампушка
дзеўка як пампушка. Ельск., Слаўг. Ухв. Пра поўненькую прывабную дзяўчыну. ФСГ, 221; Нар. слов., 75.
як пампушка. Мсцісл. 1. Няўхв. Пра распухлага чалавека. 2. Івац. Ухв. Пра сытага, поўнага, асабліва дзіцёнка. Юрчанка, 193; ЗЗайкі.
ладкі як пампушкі. Касц. Ухв. 1. Пра пышныя апетытныя аладкі. 2. Пра ручкі немаўляці. Бялькевіч, 245.

памчаць
як бы каго вецер памчаў. Гл. вецер.

памыі
як памыямі абліты. Свісл., Івац. Няўхв. Пра стан чалавека, зняважанага, зняслаўленага кімсьці. Даніловіч, 240; ЗЗайкі.
віжаваць як сука на памыях. Гл. сука.

памыйны
прыбіцца як кот памыйны. Гл. кот.

памыты
сядзець як памыты. Рэч. Няўхв. Пра чалавека, які вельмі рана ўстаў, нічога не робіць - сядзіць і чакае снядання. ЛЦ, 123.

памыцца
проста як голаму памыцца. Гл. голы.