вымагаць — прасіць цану за тавар.
Платы не вымагала, колькі давалі, прадавала.

вымантачыць — выпрасіць, выцыганіць.
Ён усе грошы вымантачыў у маткі.

вымаўчаць — змоўчыць, не зважаць.
Ён крычыць, я трываю, алі часам і ня вымаўчыш.

вымышленне — прыдумванне, выдумлянне.
Ён ня можаць без вымышлення, усё вымышляіць і вымышляіць, абы ня так.

вымякшыць — вырабіць, зрабіць мяккім.
Каб вымякшыла шкурку, дык ей добрая футрачка была б. Падушку вымякшыш, дык галаве лягчэй.

вынас — плата пастуху.
Не ў нос яму такі вынас, ласейшага чаго хацеў.

выпарак — неслух.
І гэтыя выпаркі-рабяты такія зладзеі.

выпаўзень — скурка, якую скінуў вуж.
Вуж рубашку скінуў; вужы, яны ліняюць, а тады сыходзіць з іх выпаўзень.

выпінацца — вытыркацца, вылучацца, сіліцца.
Кожны выпінаецца як можаць, каб якую капейчыну заробіць. Ён перад начальствам выпінаецца, каб заўважылі.

выпладзіцца — вывесціся.
Сінічкі выпладзіліся, дзеці рукамі паролі, дык сініца адраклася.

выпруджвацца — напінацца, выстаўляцца.
Выпруджваецца што сілы, каб яго заўважылі.

выпукацца — надзьмуцца.
Як мячык, выпукаецца й коціцца на кароткіх ножках.

вырабатываць — вырабляць.
Хата, дзе скуры партызаны вырабатавалі.

вырабляць — зарабляць.
Хай служыць, хай вырабляіць сабе пенсію.

вырай — купка, куст.
У Грамніцкім бары знайшлі цэлыя выраі грыбоў.

выранджацца — вычварацца, капызіцца, строіць з сябе.
А не выранджайся дужа, знаім, адкуль ты, дружа. Выранджаўся-выранджаўся, пакуль ня ўсраўся.

вырасці — стаць, вывучыцца.
Ейны мужык урач, і яна сама на ўрача вырасла.

вырван — неслух, дуронік, вісус.
Вырваноў сваіх прышлюць на лета да дзеда.

вырый — яміна, адкуль выбралі торф.
У вырыі вада злецілася, густая стаіць.

высадкі — гародніна, захаваная да вясны.
І есці хапіла, і на высадкі асталося.