Купіў-бы сяло, дык грошы гало. — Гэтак прыказвае бедны.

Купіў за пяць пальцаў. — Гэта азначае: схапіў пяцю пальцамі, украў.

Купіць ні купіць, а патаргаваць можна. — Прыказвае той, хто прабуе свайго шчасьця ў нейкім прадпрыемстве.

Куры, сьвіньня вон: машыраваць пайду. — Прыказваюць, калі няпрошаны госьць запанаваў у хаце гаспадара. Прыказка паходзіць ад таго, што даўней маскалі вайскоўцы стаялі ў вёсках на пастоі.