выладжвацца — збірацца, адыходзіць.
Выпраўляйцеся, выладжвайцеся, сваточкі.

выладнець — папрыгажэць, паправіцца.
Так выладнеў на вачах, аж не пазнаць яго.
(Ладны - значыць пазорысты, паглядны.)

вылівень, вылівак — яйка, знесенае без шкарлупкі; яшчэ — азызлы, адрузлы.
Калі куры ліюцца, ім таўкуць шкарлупінне ад яек. Вылівень ты гэткі.

вылупак — франт, хварсун, моднік.
Гэны вылупак са скуры вылупліваецца, абы надзецца ня так, як усе.

вылупіцца — прарэзацца, глянуць.
З раніцы цёпла было, сонца было вылупілася.

вымагаць — прасіць цану за тавар.
Платы не вымагала, колькі давалі, прадавала.

вымантачыць — выпрасіць, выцыганіць.
Ён усе грошы вымантачыў у маткі.

вымаўчаць — змоўчыць, не зважаць.
Ён крычыць, я трываю, алі часам і ня вымаўчыш.

вымышленне — прыдумванне, выдумлянне.
Ён ня можаць без вымышлення, усё вымышляіць і вымышляіць, абы ня так.

вымякшыць — вырабіць, зрабіць мяккім.
Каб вымякшыла шкурку, дык ей добрая футрачка была б. Падушку вымякшыш, дык галаве лягчэй.

вынас — плата пастуху.
Не ў нос яму такі вынас, ласейшага чаго хацеў.

выпарак — неслух.
І гэтыя выпаркі-рабяты такія зладзеі.

выпаўзень — скурка, якую скінуў вуж.
Вуж рубашку скінуў; вужы, яны ліняюць, а тады сыходзіць з іх выпаўзень.

выпінацца — вытыркацца, вылучацца, сіліцца.
Кожны выпінаецца як можаць, каб якую капейчыну заробіць. Ён перад начальствам выпінаецца, каб заўважылі.

выпладзіцца — вывесціся.
Сінічкі выпладзіліся, дзеці рукамі паролі, дык сініца адраклася.

выпруджвацца — напінацца, выстаўляцца.
Выпруджваецца што сілы, каб яго заўважылі.

выпукацца — надзьмуцца.
Як мячык, выпукаецца й коціцца на кароткіх ножках.

вырабатываць — вырабляць.
Хата, дзе скуры партызаны вырабатавалі.

вырабляць — зарабляць.
Хай служыць, хай вырабляіць сабе пенсію.

вырай — купка, куст.
У Грамніцкім бары знайшлі цэлыя выраі грыбоў.